KRALENDIJK – Un tim spesial
di Kuerpo Polisial Hulanda
Karibense ta investigando un kaso
kaminda den oranan di djamars
mardugá a bin haña un dama
morto ku tiru den kabes den un
apartamentu na Kaya Irma na
Antriol. E investigashon mester
saka na kla kiko realmente a
sosodé e mardugá ei, sea ta e muhé
mes a kometé suisidio òf si ta trata
aki di un krímen pashonal. Polis a
realisá un detenshon i ta hasiendo
e interogashon nesesario.
Bosero di Ministerio Públiko ta
informá djamars tempran di
mardugá a drenta informe di un
insidente serio den bario di Antriol
i na unda a bin sali na kla ku un
señora a pèrdè su bida. Bou di
liderazgo di Ministerio Públiko a
start un investigashon pa
determiná e kousa eksakto di
morto di e víktima.
A detené djamars mardugá
mes na un adrès un sospechoso
relashoná ku e kaso. Ta trata aki
di e hòmber di inisial L.A.C.C di
Boneiru. A tene dos entrada
hudisial den oranan di mardugá,
miéntras ku e investigashon ta
kontinuá. Relashoná ku e
investigashon no por duna mas
detaye.
Informashon di kua Extra ta
disponé ta mustra ku e víktima di
inisial R.C.R.C. a nase na Venezuela
na 1971, pero tin algun aña
kaba bibá na Boneiru i ta traha
den e ramo di beyesa. Pa algun
tempu kaba e muhé ta biba su so
den un apartamentu na Kaya Irma.
Den oranan di mardugá, den
kareda di 1’or, besiñanan a tende
tiru i mesora a yama polis. Na
yegada di e promé patruya nan a
bin topa ku e dama ku tiru den su
kabes drumí abou den un plas di
sanger. A pidi presensia di dòkter
ku a konfirmá morto. Ministerio
Públiko a tuma e kurpa sin bida
den beslag pa asina hasi outopsia
di lei riba dje. Lo manda e kurpa
Hulanda, pa asina NFI por hasi
investigashon forénsiko.
Djis un ratu despues polis a bin
detené e sospechoso L.A.C.C. i
tambe a konfiská su outo. E
sospechoso aki mester lo tin òf
tabatin sierto relashon ku e dama.
Polis ta hasiendo e
interogashonnan nesesario pa
determiná te kon leu su
embolbimentu ta den e kaso aki.
Mesun mardugá polis a bishitá
un kas den Amboina. Aki e hòmber
ku ken e dama tabata biba kuné
anteriormente ta bibando. No ta
konosí ki relashon e entrada
hudisial aki tin ku e kaso, pero
mirando ku e hòmber aki tabata
kompartí bibá ku e dama den
pasado, polis lo ta interesá den su
vershon tambe.
Tin vershon no ofisial ta sirkulá
ku polis no a logra haña e arma
na e sitio di e suseso. Si esaki ta
kuadra ku bèrdat, e ora ei mester
tabatin un òf mas persona enbolbí
i por papia aki di un asesinato òf
homisidio. Te ainda sinembargo ni
polis ni Ministerio Públiko no ke
bai den e detayenan ei.