KRALENDIJK – Boneiru na e momentunan aki no ta disponé di e posibilidat pa hasi tèst riba presensia di e variante nobo di e coronavírùs ku resientemente a diskubrí na Inglatera. Esaki segun e médiko di sekshon di Salubridat Públiko di Entidat Públiko Boneiru, Marian Luinstra-Passchier.

Segun e médiko, pa por hasi e tèst pa detektá si e variante ta presente na Boneiru tambe, mester disponé di un laboratorio sofistiká, loke Boneiru no ta disponé di dje na e momentunan akí. Naturalmente semper tin e posibilidat pa manda tèst afó pa análisis. Ounke ku kasi nunka Boneiru ta risibí pasaheronan direktamente for di Gran Bretaña, ta tene tur posibilidat na bista pa sa si na Boneiru tin ku hasi e investigashon akí tambe, Luinstra a splika.

Variante britániko

Segun Luinstra e variante britániko nobo ta hopi den diskushon rònt mundu i naturalmente na Boneiru tambe tin atenshon pa esaki esaki. E variante britániko ta muchu mas kontagioso ku e variante anterior, un estudio nobo di Imperal College di London ta indiká. Nan ta bisa ku ta e kambio di mas serio desde ku e epidemia a start.

Segun promé resultadonan di un investigashon britániko, e vírùs modifiká ta plama su mes mas rápido bou di hóbennan bou di 20 aña, partikularmente bou di alumnonan di skolnan sekundario. Ounke ku e sientífikonan ta bisa ku e resultadonan di investigashon akí kisas ta duna un imágen inkorekto debí na e sirkunstansianan. Otro investigashon di e variante britániko ta mustra ku esaki ta mas kontagioso, pero no spesífikamente pa mucha i hóben so,

Tèst mucha tambe

Loke sientífikonan sa si awor ta ku personanan infektá ku e variante britániko tin un kantidat di vírùs mas grandi. “E ora ei por ta posibel ku e porsentahe ku di bèrdat tin keho ta mas haltu. Tin mas hende ku keho i tambe pues mas mucha ku keho. Pero análisis nan te ku awor no ta mustra ku nan ta bira mas malu tambe, virólogo Marion Koopmans ta bisa.

Gabinete hulandes riba e último dia di aña a adoptá e konseho di e Outbreak Management Team (OMT) pa tèst muchanan bou di 12 aña tambe ku tin keho ku por tin di aber ku corona, segun e sait di notisio di NOS.