KRALENDIJK.- Gezaghebber Edison Rijna a anunsiá ayera ku Boneiru entrante djaluna awor ta habri konekshon aéreo atrobe ku Kòrsou. Mientrastantu a hasi tambe un petishon ayera na ministerio di Relashon Eksterior di Hulanda, pa Boneiru bira un destinashon ku kódigo hel. Awor aki ainda Boneiru tin kódigo oraño. Asina ku sa e resultado lo anunsiá esaki.

Pasahero for di Kòrsou por bini Boneiru ku avion òf  boto entrante djaluna 26 di òktober benidero, basta nan a hasi e PCR tèst pa mas tardá 72 ora promé ku e buelo i resultado di e tèst ta negativo . Nan mester tin un deklarashon di salú tambe di Salubridat Públiko di Boneiru. Por haña esaki riba wèpsait di gobièrnu òf pidi unu na publichealth@bonairegov.com.

Por lo pronto lo tin di djaluna te ku djaweps 4 buelo pa dia for di Kòrsou. Pasahero di Boneiru por biaha bai Kòrsou. Ora di bin Boneiru bèk nan mester laga hasi e PCR tèst na Kòrsou pa mas tardá 72 ora promé ku nan buelo. E resultado mester ta negativo. Ora nan bini Boneiru bèk nan no tin nodi di bai den karentena.

Rijna a sigui splika: "Pasaheronan di Statia i Saba por biaha bin Boneiru sin tèst di PCR. Statia i Saba ta forma huntu ku nos isla un asina yamá 'bubble'. Ke men un área den kua ta seif pa biaha. Pasaheronan di Aruba, Sint Maarten, Canada i Merka por bini Boneiru, via Kòrsou basta nan hasi e PCR tèst pa mas tardá 72 ora promé ku nan buelo i resultado di e tèst ta negativo. Nan tambe mester yena e deklarashon di salú di departamento di Salubridat Públiko."

"Ta prolongá prohibishon pa buelo dirèkt for di Merka ku dos siman te medio novèmber.

Si e kondishonnan keda bon, por suavisá mas ainda i habri pa mas  pais  ora esaki ta responsabel. Ku esaki mi kier duna un perspektiva na nos sektor turístiko", Rijna a trese dilanti.