WILLEMSTAD.- Liemarvin Bonevacia i Ramsey Angela ayera a duna e mihó di nan parti na e ekipo di relevo 4x400m. di Hulanda pa yuda nan ekipo pa gana medaya di oro den Kampionato Oropeo ‘indoor’ na Polonia. E duo kurasoleño huntu ku nan koleganan di ekipo a rematá pa kue oro, meskos ku e damanan hulandes tambe a hasi riba e mesun disiplina di 4x400m.

Hulanda sorpresivamente a resultá e máksimo ganadó di oro den e Kampionato Oropeo. Sin duda mester menshoná e aporte di nos atletanan na e totalidat. Djasabra Bonevacia mester a keda kontentu ku su ripitishon di bròns riba 400m., despues ku el a start e kareda komo e gran faborito. Pero ayera riba 4x400m. tabata un otro kansion... no tabatin fayo!

E hulandes Jochem Dobber tabata e promé koredó i a traha riba un bentaha ku e ekipo no a laga bai. Bonevacia tabata esun ku a tuma e baston serka dje, siguí pa Angela i finalmente Tony van Diepen pa huntu nan pone un rèkòrt hulandes nobo ku tempu di 3:06.06.  República Cheka a drenta na di dos puesto (3:06.54), siguí pa Gran Bretania (3:06.70).

Serka e damanan tabata e mesun kansion. E super talento Femke Bol kende a gana oro riba 400m. individual, tabata fuerte huntu ku su ekipo pa nan tambe krusa ‘finish’ na promé lugá i yuda marka historia pa atletismo hulandes, ku pa promé biaha ta finalisá Kampionato Oropeo na e puesto di honor, ku 4 oro, 1 plata i 2 bròns.

Pa Bonevacia, e prestashon na Polonia ta nifiká ku den su karera awor e tin 4 medaya na nivel oropeo, ku ta 1 ora i 3x bròns.