ORANJESTAD.- Outoridatnan na Aruba ta keda konfrontá problema ku lanchanan ku ta yega for di Venezuela sea ku hendenan indokumentá òf ku merkansia prohibí. Djabièrnè anochi esei tabata e kaso un bia mas ora ku pa mas o ménos 23:50 ‘Radarkamer’ a detektá un boto na nort di kabes di e isla. Mesora a pone wardakosta na  Savaneta na altura di esaki i tambe a notifiká e Dash pa nan por identifiká e boto.

Sentral di polis a manda patruyanan di kosta den e área di San Nicolaas pa kontrol kosta di Aruba. E ‘metalshark’ di wardakosta huntu ku ‘Panter’a drenta akshon i despues di un persekushon ku a dura basta largu a logra interseptá e boto na 3.3 mia na nort di kabes di Aruba.

Na bordo a detené e kapitan i su ayudante. A topa ku 10 purunchi, miéntras ku na tera patruyanan di kosta a logra haña 2 bulto na altura di Boca Keto . A konfiská esakinan pendiente di mas investigashon.