WILLEMSTAD.- Durante di e próksimo wikènt, dianan 16 i 17 di desèmber “A Special Day”, organisando e di 5 edishon di Bouncer Paradise. Un mini parke di divershon kaminda e chikitin i tambe su mayornan por pasa un ratu sumamente ameno.
Lo bai tin diferente bouncers, weganan di feria, pero tambe algun atrakshon di Coney Island. Den algun di e atrakshonnan aki, e mayor tambe por kompañá e yu.
E evento ta tuma lugá riba Brionplein. Pa seguridat di tur e muchanan Brionplein lo wòrdu será, pa asina nos por garantisá ku tur mucha ta safe.

E evento:
Lo bai ta 2 dia tremendo pa e famia kompleto.
Dia 16, nos ta kuminsá 3’or di atardi i terminá 10’or di anochi.
Dia 17, nos ta kuminsá 1’or di mèrdia i terminá 10’or di anochi.
Entrada ta grátis. Bo ta paga pa partisipá na e diferente atrakshon nan.

Kiko tur lo bai tin:
Lo bai tin diferente bouncers, den kual e muchanan por bula, subi, slep i tambe gatia. Kòrsou tin su mini mini coney island, i tur e aparatonan aki tambe lo ta riba Brionplein. Bin dal un rònchi den ASD Xpress, nabegá den e Pirate Ship, Crazy Tunnel lo hasi bo crazy. Un skina ku weganan di feria kaminda bo por gana premionan masha leuk mes. Na kada ‘item’ lo tin un persona presente pa por tira bista riba e muchanan i pa seguridat nos ta pidi pa sigui instrukshon nan ku ta ser duná. Pa e mayornan ku ta bini ku e muchanan, prepará pa boso tambe move. Tin premio pa boso tambe.