Boy Louisa, un dje mihó entrenadónan di beisbòl na Kòrsou

Deporte

WILLEMSTAD.- Lucardo “Boy” Louisa a nase riba 18 di òktober 1951 na Kòrsou. Boy su karera deportivo ta partí den 2 kategoria: Deportista i Dirigente tékniko. Boy a praktiká e deporte di beisbòl i tabata un pelotero ku semper a bati, fildia i picha bon i komo manager di beisbòl a bira hopi konosí pa su disiplina. Boy ta un hòmber ku ta super den ‘basics’ di beisbòl. E mes tabata fungi komo player/ manager/coach i entrenadó. Ora kos bira pèrta, e mes ta tuma e bala i subi riba montíkulo. Na aña 1978 Boy huntu ku Alvin “Fichi” Fleming a bai ‘upgrade’ nan konosementu komo entrenadó na Spring Field College.

...Boy a haña rekonosementu di FEBEKO i a lansa promé bala...

Karera komo deportista:

Na aña 1957 Boy a kuminsá hunga beisbòl ku 6 aña den e bario di Dein, Suffisant, Buena Vista i bisindario. For di komienso, el a kuminsá ku bala di tènis, hungando den bario ku e team Santurce di señor Vos, ku tabata dirigí beisbòl di bario pa bario na Kòrsou. Despues Boy a hunga den hubenil.

Na aña 1965 kos a bira serio, ora Boy a bai hunga den Klase A den e team Atlanta, lantá i dirigí pa Henky Hersilia i Elvin Eugenio. Despues el a pasa pa Union Dein.

Sta. Maria 100 Pipers:

Despues Boy a pasa pa e ekipo di Santa Maria 100 Pipers di Frank Curiel. Tabata Frank Curiel ku a aserká su tata pa e por hunga pa e team di Santa Maria. Nan a sali kampion Klase A promové pa AA. Boy tabata e promé hungadó ku Frank Curiel a buska. Boy mester a pidi commandant di Marine Kazerne Suffisant, pèrmit pa e por a bai train i militá den e team di spònser pa whisky 100 Pipers.

Alpha Zelbo:

Na aña 1974 Boy a lanta un club den Dein ku tabata yama "Alpha Zelbo". E tabata duna lès na e hungadónan i te hasta duna ‘proefwerk’. E tempu ei Boy tabata pone regla ku si tin wega djadumingu, ningun hende mag di sali for di kas djasabra anochi. E tabata pasa kontrolá si e hungadónan tabata na kas. Boy mes ta hari ora di konta e kosnan aki i ta bisa ku nan tabata ward’é pasa pa despues sali. E disiplina ku Boy tabata implementá tabata duna fruta, paso despues di a hunga 3 aña den Klase A, Alpha Zelbo a gana e ekipo J&B di Wilfrido Valeriaan, bira kampion na 1977 i subi AA. E mesun aña 1977 Alpha Zelbo ku Boy Louisa riba montíkulo a shutout J&B di Wilfrido Valeriaan 2-0. Na aña 1985 Boy a funda un otro team tambe ku tabata yama "Basics".

...Boy Louisa promé sinta te na rèks den Groot Kwartier Stars...

Den AA:

Den Boy su promé aña komo pelotero den beisbòl ‘AA’ el a hunga den e ekipo Super Shell i a sali kampion bate den su promé aña. Despues na 1965 Boy a hunga 1 aña komo shortstop den Chicago Beisbol Club. E aña ei mes e team a degradá.

Di 1973 pa 1975 Boy a hunga den ‘AA’ ku Lucas Bols Groot Kwartier Stars, dirigí pa Daniel "Ganga" Chirino, huntu ku e.o. Lechito Kelly, Boeis Offerman, Stanley Engelhardt, Rudsel Poulina, Elfrin Poulina, Eithel ‘Llave’ De Caster, Renee Flocker, Stanley Martha, Mario Mujica, Bencho Imperator, Grandi v/h Kruys i otronan

Ora Alpha Zelbo a subi pa ‘AA’, e tabata player/manager. El a keda te ku aña 1981 komo manager den Alpha Zelbo.

Na aña 1982 Boy a kambia di e ekipo i a hunga un temporada den Groot Kwartier/Banco di Caribe, huntu ku e.o. Naai Hooi i Ramses Sprock.

Boy na vários okashon a forma parti di selekshon, e.o. na aña 1976 ku Kòrsou ku a gana di Hulanda 12-9. Na aña 1969 e tabata ku selekshon antiano den Kampionato Mundial na Rep. Dominicana. Na e okashon ei el a konektá tripel kontra Guatemala pa empuhá kareda di viktoria pa Antia gana 2-1.

...Alpha Zelbo ku Boy Louisa komo entrenadó...

Karera komo dirigente tékniko:

Na aña 1972 Boy a kuminsá fungi komo entrenadó i manager di hopi ekipo di beisbòl little league i a representá Kòrsou komo manager/coach di diferente selekshon den region. Pareu ku esei e tabata train teamnan di klasse A i AA i sòftbòl aki na Kòrsou. Den añanan 70, Boy tabata coach di Siboney di Santa Rosa. Boy huntu ku Eddy Daou a dirigí selekshon Little League na Maracaibo, Venezuela.

Boy tabata player/manager di e ekipo Alpha Zelbo i na 1977 el a bira Kampion di Kampionato A-klasse ku nan i subi pa AA. Boy a yuda forma hopi pelotero, poniendo atenshon riba e parti di disiplina. Na aña 1982 Boy a bira manager i entrenadó di e gran ekipo Wild Cats Something Special.

Rekonosementu risibí:

- 2011 Durante e Torneo Andruw Jones.

- 2019 Komo baluarte di nos beisbòl AA, dor di FEBEKO.

- 2019 El a haña e honor pa tira promé bala di All Star Game di Federashon di Beisbòl di Kòrsou (FEBEKO);