WILLEMSTAD.- Ayera tabata e promé dia ku a kuminsá bende vürwèrk na Kòrsou. Semper riba e promé dia, Brantwer Kòrsou ta pasa tur e stentnan pa kontrolá si nan ta dispone di tur e rekisitonan di seguridat.

Den deklarashon pa EXTRA, sr. James Wilson di brantwer a bisa ku ayera nan a parti Kòrsou den tres grupo ku a kore hasi kontròlnan. Ta trata di 58 stènt ku ta bende vürwèrk. E kantidat e aña aki ta 19 stènt ménos.

Wilson a bisa ku brantwer no a konstatá ningun iregularidat durante kontrol.

Sr. Wilson mes a bai Alivio, Gosieweg, Saliña i Bonam. Loke a konstatá ta ku ainda e doñonan di stènt tabata yena rèkinan. Pues tabata abastesé e stèntnan ku vürwèrk. Pero esaki no a impedí Brantwer pa tòg realisá e kontrol nesesario riba situashonnan manera waya di koriente, sufisiente iluminashon, kos di paga kandela etc.

E kontrolnan ta kontinuá awe ora tur stent lo ta kla pa kuminsá bende.