BRASILIA, BRASIL (AFP).- Venezuela mester selebrá elekshonnan “liber” i e “pèrdèdó” mester aseptá e resultadonan pa e pais por bai bèk na un situashon polítiko normal i liberá di sanshonnan internashonal, segun un altu funshonario di gobièrnu brasilero.
“Venezolanonan mester hasi nan parti, ku ta e elekshon. “Nos ta trahando pa e elekshonnan por keda rekonosé, prinsipalmente pa e propio venezolano”, segun e sekretaria pa Amérika Latina i Caribe dje kansieria brasilero, Gisela Padovám.
“Ta importante pa e pèrdèdó, ken ku lo e ta, ta rekonosé e ganadó, ta e base di kualke elekshon. Si esei, lo no tin kitamentu dje sanshonnan ni normalisashon di e situashon”, el a agregá.
Brasil mas aleu ta boga pa e reingreso di e pais bisiña den Mercosur, for di kua e ta suspendé for di 2017 pa a “violashon dje órden demokrátiko”.
E presidente venezolano, e iskierdista Nicolas Maduro, den elekshonnan di 28 di yüli ta buska pa haña un di tres mandato di seis aña, miéntras ku vários enkuesta ta duna bentaha na e kandidato di oposishon, Edmundo Gonzalez, ku a remplasá Maria Corina Machado, kende a keda prohibí pa tuma parti na elekshon.
E mandatario brasilero, Luis Inacio Lula da Silva, aliado di Maduro, a subi e tono ora ku el a kritiká un seri di opstákulo ku e outoridat elektoral venezolano a pone den kaminda pa oposishon. El a pidi un opservashon internashonal mas grandi despues ku a impedí Union Europeo pa tira bista riba e elekshon.
Pero, Lula tambe ta hasi un yamada pa lanta e sanshonnan internashonal ku ta pisa riba Venezuela.
Padovan a ekspresá e espektativa ku un presensia amplio di opservadornan “lo ta un refuerso dje garantisá ku e elekshonnan ta liber i transparente”.
