Riba djabièrnè 5 di òktober i djasabra 6 di òktober, 13 di e hòmbernan di mas fuerte na mundu lo midi forsa den e kompetensia di Strongman Champions League Curaçao, ku lo tuma lugá pa di tres biaha aki na Kòrsou. Riba djabièrnè e kompetensia lo ta na Sunscape. Djasabra, na Brionplein, pa promé biaha na Kòrsou, e kompetensia lo tuma lugá den oranan di anochi.

Strongman Champions League ta kompetí na 15 país na mundu, ku un total di 22 kompetensia pa aña. E torneo ta keda transmití na televishon den 95 país, ku ta resultá den mas ku 1 mil mion di televidente pa aña ku a mira e kompetensia. Na 2016 e liga a kuminsá su propio kanal pay-per-view, ku ta transmití tur e kompetensianan.

E atletanan ku ta figurá den e tòp mundial di e liga lo ta presente na Kòrsou pa e kompetensia akí. Anthony dos Santos lo representá Kòrsou pa promé biaha den e kompetensia akí. Dos Santos lo kompetí pa promé biaha na un kompetensia internashonal. For di e tòp di klasifikashon lo tei:

Matjaz Belsak di Slovenia, huntu ku e hulandesnan Alex Moonen i Johan Langhorst. Pa kompletá e lista impreshonante di kompetidor lo figurá: William Baggot (Inglatera), Jeremy Hogg (Australia), Luke Herrick (Merka), Sean O Hagen (Irlandia), Ivan Campos (Brasil), Dainis Zageris (Lètlandia), Stefan Petursson (Eisland), Marcos Ferarri (Brasil) i Travis Ortmayer (Merka).

Entrada pa e kompetensia na Brionplein ta kompletamente grátis. E gigantenan akí lo kompetí den e siguiente disiplinanan:

• 
  

• Truck Pull (hala un trùk grandi ku ta pisa di entre 12-20 ton)

• 
  

• Loading (stiwa 8 barí di 90 kilo kada un, riba un trùk)

• 
  

• Death lift (hisa un outo riba un rèki mas tantu biaha ku ta posibel)

• 
  

• Forward Hold (tene un peso di 25 kilo stret bo dilanti, pa mas largu ku ta posibel)

• 
  

Na Sunscape nan lo kompetí den 3 disiplina. Solamente wespetnan di Sunscape, i algun invitado por akudí na e kompetensia ku lo tuma lugá na Sunscape.

• 
  

• Rock lift (hisa un baranka di 100 kilo mas tantu biaha posibel)

• 
  

• Rope Pull (hala kabuya entre 2 atleta)

• 
  

• Weight for Heights (tira un peso ‘kettlebell’ di 35 kilo den laira mas haltu ku ta posibel)

• 
  

• tira un peso ‘kettlebell’ di 35 kilo den laira mas haltu ku ta posibel

• 
  

Organisashon di e kompetensia ta den man di Sport & Gezondheidscentrum Physique di Hulanda den koperashon ku QUBE, Dagelet Business Development N.V., Curaçao Extreme Power Competition i Ofisina di Turismo.

E kompetensia na Brionplein lo start 19:00 i esun na Sunscape ta kuminsá 14:00.

Paul Rabelink, direktor di e kompania Sport & Gezondheidscentrum Physique ta orguyoso di por tene e kompetensia na Kòrsou un biaha mas. “Nos ta organisá kampionato na Hulanda tambe, i pa nos por organis’é aki, ta un honor grandi. Sin e sosten inkondishonal di instansianan grandi manera Sunscape i Ofisina di Turismo esaki lo no tabata posibel. Méskos ku na Hulanda nos ta mantené e entrada grátis i esei ta hasi e evenemento akí algu úniko, ademas di ta algu yen di suspenso i intresante pa hende di tur edat mira. Nos ke invitá henter pueblo di Kòrsou pa bin gosa di e espektákulo na Brionplein djasabra awor 6 di òktober.” segun Rabelink.

E hecho ku ta filma den oranan di anochi lo duna un toke spesial na e grabashon di e evento akí i lo sòru pa imágennan bunita di Kòrsou ku ta bai internashonal. Komo ku e kompetensia aki a kai hopi na agrado, e aña aki lo tin, no unu, sino dos grabashon pa televishon.