WILLEMSTAD.- Ku su forma úniko pa motivá su mes promé ku kareda i despues tambe ku su selebrashon habitual, e atleta yu di Kòrsou Liemarvin Bonevacia djasabra 4 di mart na Belgrado, Servia, a konkistá medaya di bròns den Kampionato Oropeo ‘indoor’ riba su distansia di 400m.

Bonevacia for di den kareda di ‘heat’ i tambe den semi final a demostrá ku e ta den tremendo forma. E manera ku el a kore djasabra último, saliendo ku un tremendo ‘speed’ for di kuminsamentu pa e por kompetí kontra dje cheko Maslak, sin duda a yud’e den final dje kareda.

E yu di Kòrsou a marka un bon tempu di 46.26 sekònde, ku ta un rekòr ulandes nobo kibrando e marka di 46.71 di Brom Peters. Anteriormente, aña pasá na Boston, ya Liemarvin a kore 46.46 pero esei no a keda rekonosé pa Atletiek Unie komo rekòr nobo pa motibu ku no tabatin tèst di doping. Awor si ku esei ta e kaso, nan ta rekonosé e prestashon dje atleta.

E kareda di djasabra a keda ganá pa e cheko Pavel Maslak (45.77) miéntras ku e polako Rafael Aneko (46.08) a kue bròns.

...Meternan final dje kareda na Servia, ku Liemarvin na di tres puesto...

...E medayistanan djasabra na Servia riba 400m., ku d.r.p.d.: Amelko (Polonia), Maslak (Rep. Cheka) i Liemarvin Bonevia (Ulanda)...