KRALENDIJK – Santana katóliko di e parokianan San Bernardo i Coromoto a para bira atrobe un lugá na unda tin hende ta laga artefaktonan ku opviamente tin di aber ku brua atras.

Atrobe, pasobra den añanan ochenta tambe e fenómeno aki tabata basta konosí, pero a keda ketu pabasta aña. Reporteronan di Extra a bai tira un bista.

E hendenan ku ta supervisá e santana aki ta preokupá pa loke ta pasando. Nan petishon ta pa hendenan ku ta atendiendo ku e práktikanan aki stòp ku loke nan ta hasiendo. No ta bista agradabel. Ademas na un dje kèlder asta a pone un bestia morto, aparentemente un galiña, mará den un saku di plèstik pretu, plamando un holó hopi stinki.

Tin hende ku ta masha kouteloso pa saka konklushon. Ta papia di ‘porkeria’ ku hende ta pone na grafnan den santana. Òf di bagamunderia. Pero esnan ku tin sikiera un tiki noshon di brueria sa di kiko ta trata aki. Sea pa pidi fabor, hasi malu na otro hende, kisas komplasé defuntunan, tin hende ta laga artefaktonan straño atras, kisas kompañá ku seremonia.

Reporteronan di e korant aki a bai tira un bista. Na sigur kuater pa sinku kèlder tabatin artefakto straño i misterioso poné. Na un dje kèldernan por ehèmpel un saku di plèstik yen di paña. Na otro kèlder un baki den kua tabatin un saku pretu ku bestia morto aden.

Semper e fenómeno aki sa manifestá, pero awor ta di remate. Nunka e persona ku ta tira bista riba e santana a mira tantu kos straño asina. Anto esaki ta solamente e dos sekshonnan

parti pabou. Djo sa kiko tin den e otro sekshonnan?!

Ta pidi e hendenan ku ta kana hasi e kosnan aki pa laga e defuntunan na pas. No pone e kosnan aki mas. Ta bon pa nan tene kuenta ku tin hende tin nan na bista.