WILLEMSTAD.- Bryan Palm, produktor musikal i konosí komo ‘dj Menasa’ a tuma e desishon di dal bai ku su pashon. Ayera nochi tempran Bryan a skibi un ‘post’ riba facebook ku a kapta atenshon sigur di su siguidónan. Ayera tabata un dia speshal pa Bryan i el a kompartí esaki ku su amigunan, famia, konosí i koleganan.

Despues di a laborá 4 aña na Ennia el a tuma e desishon ku awor e tei dediká su mes na muzik. “For di day 1 ku mi a kuminsá ku muzik, mi no a stòp i nunka lo mi stòp. Sigun mi asta ora mi muri, lo bo tende ‘beat’ bati den e kaha.
Un aña pasá ma kuminsá toka bèk komo dj i ma bin realisá ku e muzik ta parti di mi naturalesa.

Ora mi ta traha muzik òf toka, mi ta den un otro mundu. Dos luna pasá mi a bai hasi un Tour na Ulanda kaminda mi a toka rònt Ulanda i tambe na Alemania. Ora mi a yega bèk Kòrsou, hendenan ta bisa mi wèlkòm, ‘welcome back to reality’. E kos ei a ‘zit mi dwars’, paso esaki no ta mi ‘reality’.

Mi a kaba di sali for di mi ‘reality’: 24/7 muzik. Asina mi a disidí ku awor ta e momentu pa sigui dal bai ku mi pashon”, asina Bryan a kompartí ku su siguidónan. Bryan a gradisí Ennia pa tur e kosnan great, pa e eksperensia di por a traha na e kompania i di por a forma parti di e ‘green family’.

Tomorrowland

Dj Menasa a keda kontratá pa forma parti dje line up di ‘Tomorrowland’ e aña aki, esaki despues di su eksitoso ‘tour’ na Ulanda. E festival di ‘Electronic Dance Music’ ku ta tuma lugá na e siudat di Boom na Bèlgika durante di dos wikènt den luna di yüli próksimo. Ku un asistensia di mas ku 350 mil hende e festival ta un di esnan di mas grandi na mundu.

Ku e kontrakt pa presentá na Tomorrowland, dj Menasa ta bira e di dos artista yu di Kòrsou ku ta presentá na e evento. Den  pasado, pa ser eksakto, na 2012 i 2013 e trio di Shermanology tabatin presentashon na Tomorrowland.

‘DEN E BEMBE’ ke deseá Bryan Palm tur klase di éksito ku su karera profeshonal, biba bo pashon!.