MERKA.- E surkoreanonan a bira eufóriko despues ku un banda di mucha hòmber di e género K-Pop ta logra alkansá e promé lugá di benta na Merka.
Billboard a informá ku ta e promé albùm di idioma estranhero ku ta logra alkansá e number 1 despues di 12 aña. E último tabata e kuarteto ‘Il Divo’ na 2006.
‘Love Yourself: Tear’ ta na kabes dje lista di benta via di iTunes na 65 pais, esaki despues di su lansamentu, entre otro Merka, Oustralia i Brasil, segun e agensia surkoreano, Yonhap.
E último artista koreano pa alkansá un impakto mundial tabata ‘Psy’ ku su éksito mundial ‘Gangnam Style’, pero su albùm nunka a bira number 1 na Merka.
E balor dje industria K-Pop rònt mundu a dupliká for di 2013 alkansando 4900 mion dòler, segun informashon di e portal finansiero Bloomberg, sitando análisis koreano.