WILLEMSTAD.- Ta fin di aña i ya kaba a kuminsá prepará pa e diferente presentashonnan ku lo ta den porta. Durante di e último añanan bandanan a bira masha kreativo i stratégikamente ta krea piesanan ku lo zona den fin di aña i tin biaha tin asina tantu potensia pa zona den temporada di Karnaval tambe. Esei ta sigur e meta ku Buleria tin ku e piesa riba kual Jaido, e artista urban di momentu ta figurá.
Jaido ta keda prominente i a bin ta demostrá ku tur negativo ta bira positivo. E hóben ta probechando tur oportunidat i ta hasi esaki na máksimo satisfakshon di su fanátikonan. Ata Jaido ku Buleria! E piesa “Bati P’abo”, kantá pa Rocco i Tommy ta un ‘party song’ ku sigur lo zona e fin di aña aki. Ademas di esei, ta inová dor di krea un fushon di ritmo kombiná i e género musikal ‘trap’ ku ta e loke ku Jaido a bin ta profilá tremendamente aden.
Su hit ‘Speed’, tin hóben i grandi ta kanta. “No poncha...” a bira un ‘kick’ den tur kombersashon. Dwight Leoneta i Greyan Pastor a kolaborá pa promé bes ku otro, ámbos produktor ta satisfecho ku e produkto final.
E videoclip lo ta riba YouTube awe, djabièrnè 10 di novèmber, miéntras ku e piesa a kuminsá zona ayera, djaweps na radioemisoranan na Kòrsou i Aruba. Por sigui Jaido riba Instagram i snapchat @jaidorick.
Fanátikonan por mira e videoclip riba e Youtube Channel @decodedofficial òf solisitá e track na nan radio preferí. Ademas, por stream riba ITunes, Spotify, Google Play i Apple Music.