WILLEMSTAD.- E konosido kantante rubiano C-zar Olarte tin komo meta bolbe subi tarimanan internashonal presentando den vários pais manera el a hasi tempu ku el a forma parti dje orkesta di Chichi Peralta. El a produsí diferente kansion na spañó ku esaki komo meta. Den e kuadro aki el a kaba di pone un kansion riba merkado ku no solamente tin tinta pa bira hit lokal pa loke ta Islanan ABC, pero tambe internashonal.
‘Aunque mal pague’ ta nòmber dje kansion ku el a kaba di pone riba merkado. Pa esnan ku no sa C-zar Olarte a toka den ERA na 1999. Na 2000 el a pasa pa forma parti di e popular orkesta dominikano di Chichi Peralta. Na komienso di 2002 el a bai laga e orkesta di Chichi Peralta. Estando ku Chichi Peralta el a kosechá hopi éksito den un tempu hopi kòrtiku. Na 2001 e CD a gana un Latin Grammy kual tabata konsistí di 11 kantika. Dje 11 kansionnan aki C-zar Olarte a kanta no ménos ku 8 di nan kua a hib’é na e premio di Latin Grammy, pero Chichi Peralta no tabata kier pa el a haña su trofeo di kual e tabatin derechi riba dje.
E mesun álbum a gana premio Gaviota na República Dominicana, kua ta e distinshon di mas haltu pa músika na e pais di merengue. E álbum a gana tambe dos disko di oro na RCTV.
Komo kantante prinsipal dje orkesta di Chichi Peralta el a bishitá un total di 14 diferente pais na vários okashon pa konsierto, radio i tv tour. El a kanta den Sabado Sensacional vários biaha Radio Caracas, TV Caracol Colombia, na kanal tv di Argentina. El a pasa na Miami na Televisa, na Despierta America, Gordo y La Flaca, Primer Impacto i tambe el a kanta de Don Fransisco. Na Cartagena Colombia el a yega di kanta dilanti un públiko di mas ku 250 mil espektador.
Aktualmente e ta move ku su propio agrupashon musikal i tin plan pa subi e merkado internashonal atrobe. Su deseo ta pa tur esnan ku ta prosedente di Islanan ABC disfrutá di loke el a kaba di pone riba merkado.