WILLEMSTAD.- Camila Chinchilla, representante di Costa Rica, a wòrdu koroná komo Miss Teen H2O Press djaluna anochi durante di Rueda di Prensa i Instalashon di kandidatanan pa Miss Teen International H2O Ambassador 2018 ku a tuma lugá na Renaissance Resort Curaçao.
Un total di 11 pais ta ser representá den e di 4 edishon di e sertámen internashonal aki ku tin e tema prinsipal di ‘Water Conservation’. E kandidatanan aki lo ta ‘H2O Ambassadors’ ku e meta prinsipal di krea konsientisashon internashonal riba e problema mundial kresiente di skarsedat di awa.
Durante di e siman aki nan lo konta ku un agènda pisá di charla i workshop, bishita na entre otro Ofisina di Turismo (CTB) i tambe nos minister di Enseñansa, Siensia, Kultura i Deporte, diferente photoshoot i kompetensia kaminda entre otro nan lo presentá nan ‘Water Project’ na e kuerpo di hurado. E kompetensia final lo tuma lugá djasabra próksimo 10 di novèmber 2018 pa 8or di anochi den Atrium di Renaissance Resort Curaçao.
International Beauty & Fashion Foundation ta sumamente satisfecho ku e inmenso reakshon internashonal ku e sertámen ta risibiendo ya kaba entre otro atraves di medionan sosial. Por sigui tur akontesimentu riba e página di Facebook i Instagram di Miss Teen International H2O Ambassador 2018.