WILLEMSTAD.- Camila Chinchilla prosedente di Costa Rica ta bira e di 4 Miss Teen International H2O Ambassador. E ta bira e susesor di Liz Escalante di México ku a sa di karga e korona ku hopi klase e aña ku ta tras di lomba.
Camila lo bai tin e trabou noble di karga e kousa di e sertámen kual ta ‘Konservashon di Awa’ i lo mester usa su plataforma pa krea mas i mas konsientisashon mundial riba e problemátika di skarsedat di awa.
Atrium di Renaissance Hotel Curaçao a konta ku un públiko grandi ku a bini pa presensia e sertámen final pa klousurá un siman pisá ku e kandidatanan tabata tin tras di lomba unda entre otro Camila a keda skohé komo ‘Miss Teen H2O Press’, Zitlaly Vargas di Riviera Maya a keda skohé komo ‘Miss Teen H2O Internet’ i Alexia Gonzalez Pacheco di México a konkistá e título di ‘Miss Teen H2O Best National Costume’ i alabes e puesto di segundo finalista.
Nos Ana-Clara Jansen di Kòrsou a konkistá e puesto di promé finalista i alabes a keda skohé komo ‘Miss Teen H2O Best Body’. Tambe Katelynn Lawrence di Canada a keda skohé bou di e kandidatanan mes komo ‘Miss Teen H2O Amity’ pa su personalidat grasioso i amabel i e forma ku el a sa di forma amistat ku kada un di su kompañeranan.
International Beauty & Fashion Foundation (IBFF) ta mira bek un biaha mas riba un sertámen eksitoso i ta hopi satisfecho ku e kresementu ku e ta sigui mira kada aña di nobo den e sertámen su akohida internashonal. IBFF kier a gradisí su tim, tur kolaborador i spesialmente tur spònsernan ku a yuda pa hasi e sertámen unu di e nivel haltu ku por a wòrdu eksperensiá.