OTTAWA, CANADA, AFP.- Canada a anunsiá sanshonnan nobo kontra e régimen asesino di Iran i a prohibí nan entrada pa semper. Ta trata di 10 mil funshonario, inkluyendo miembronan di Guardia Revolushonario, e ehérsito ideológiko iraní.
“Esaki ta un medida ku solamente ta keda usa den sirkunstansianan mas grave kontra régimennan ku ta keda kometé di krímennan di guera òf genosidio manera Bosnia i Ruanda”, asina promé minister Justin Trudeau a bisa dunando su apoyo na e iranínan ku a protesta den kayanan kontra e gobièrnu for di tres siman pasá.
Iran ta esenario di un ola di protesta ku muhénan den e promé fila, despues di morto den prisòn di Mahsa Amini, detené pa polis komo violashon moral.
Por lo ménos 92 persona a muri for di 16 di sèptèmber segun ONH Iran Human Rights ku sede na Oslo. Gobièrnu a atmití alrededor di 60 morto, inkluyendo 12 miembro di forsa di seguridat.
“Mester eksihí responsabilidat di e régimen bárbaro iraní ku a kometé asesinatonan i a reina ku teror”, asina e hefe di gobièrnu kanades a bisa refiriendo na e despresio iresponsabel di derechinan Humano di Teheran.
