MIAMI, MERKA.- E kantante merikano di orígen dominikano, Cardi B a kombertí su mes den e promé dama rapper ku ta logra pone dos kansion riba e puesto di honor di ‘Hot 100’ di Billboard, esaki despues ku e kansion ‘I Like It’ a yega e puesto # 1, asina e revista Billboard a informá.
Ademas, e tema di Cardi B den kolaborashon ku e portorikeño Bad Bunny i e kolombiano, J Balvin a permití ku ámbos kantante logra alkansá pa promé biaha e puesto # 1 riba e lista di ‘Hot 100’ di Billboard.
Ku e logro aki ‘I Like It’ a manda e kansion ‘Sad’, di e rapper merikano “XXXTentation’ ku a muri dia 18 di yüni último, na di dos lugá.
Belcalis Almanza, e nòmber real di Cardi B, a alkansá pa promé bia e # 1 riba e lista di popularidat musikal di Merka den luna di òktober di aña pasá ku su tema ‘Bodak Yellow (Money Moves)’.
Ku e logro aki Cardi B ta e promé rapper di sekso femenino ku ta logra enkabesá e lista for di despues ku na 1998 Lauryn Hill a logra esaki durante di dos siman ku ‘Doo Wop (That Thing)’.