BOSTON.- Ceddanne Rafaela ku tremendo dia na bate ayera pa Boston Red Sox, den nan programa dòbel kontra New York Yankees. Den e promé wega Ceddanne tabata promé bate i centerfielder pa Red Sox. Ceddanne a bai di 4-2 ku honron i un kareda empuhá. E honron tabata su di dos den Liga Grandi, i alabes su di dos kontra picheo di Yankees. E honronnan a bin den weganan konsekutivo tambe. E promé tabata djamars i esun di ayera djaweps.
Miéntras ku den e di dos wega, Ceddanne Rafaela tabata un biaha mas promé bate pero e biaha aki den short. Den e wega aki tambe su bate a zona. El a bai di 5-2 ku 2 kareda anotá.
Ceddanne Rafaela awor aki tin un promedio di 368 ku 2 honron i 3 kareda empuhá den 15 wega pa Red Sox. Huntu ku su bon bate, Ceddanne a mustra hopi versátil den defensa. El a hunga weganan na segunda base, shortstop i tambe centerfield pa Red Sox.