WILLEMSTAD.- Iglesia Protestant ‘Ebenezer Church’ den kuadro di nan 88 aniversario ta presentando e fin di siman aki Pastor Charles Jenkins den konsierto.
E dos fechanan di konsierto lo tuma lugá riba dianan 28 i 29 di òktober.
Djasabra, 28 di òktober lo tin e konsierto den “Sentro Desaroyo Integral Dr. Israel Leito” na Barbadosweg 11, orario lo ta 8’or pa 10’or di anochi.
Pastor Charles Jenkins lo ta e atrakshon prinsipal riba e anochi aki. Den nos pre-show lo bai tin “the-best-of-the best” den kantantenan di gospel di Curaçao manera: Veanira Booy-Reed, Richard Engelhard, Lypson Franck Merisier, i grupo di baila Adonai Dance Ministry.
Djadumingu, 29 di òktober lo tin un sirbishi di alabansa den “Cine Rio”, den kua Pastor Charles Jenkins lo duna un mensahe spesial di speransa espesialmente pa nos hóbennan.
Tema di eventonan aki ta basá riba Isaias 60:1. – “Rise up!! Let your Faith shine!!”
Puntonan di benta di e karchi lo ta: Mensing's Caminada, Kas di Beibel i Radio New Song. Unabes bo kumpra un karchi pa dia 28 di òktober, bo ta risibí un karchi pa asistí na e anochi di alabansa i adorashon di dia 29 di òktober.}
Pastor Charles Jenkins lo wòrdu kompañá pa e banda lokal ‘Sound of Heaven’.
Tur loke ku keda rekoudá for di e konsierto lo bai pa sostené aktividatnan ku Ebenezer Church ta organisá pa e barionan den serkania di e Iglesia.