WILLEMSTAD.- Djasabra atardi 15 hóben a demostrá ku nan tin talento pa parti. Fundashon JAG i Fundashon Alelimo por ta masha kontentu ku e Festival di Tumba Hubenil 2019. Diessinku hóben bon prepará a subi tarima den Curaçao Carnival Village pa presentá nan tumba pa e públiko ku tabata presente i e kantidat grandi ku a sigui e festival tantu na Kòrsou komo na entre otro Ulanda. Na final dje anochi e sosten ku e hóbennan a risibí tabata grandi, un Kleine Werf kompletamente yen a disfrutá di un tremendo show.

FINALISTANAN
Un total di 7 finalista a keda skohe huntu ku 1 finalista via di votashon ‘online’. E finalistanan a resultá Shentily Zimmerman, Genesis Martina, Quincy Gregorio, Brithney Augusta, Zouk’aino Jacobs, Errol Cordero Reyes, Darlisha Valks i Charlson Mercelina.

RESULTADO
Quincy Gregorio a resultá e di tres finalista, Errol Cordero Reyes e segundo finalista, Zouk’aino Jacobs e promé finalista i e ganadó apsoluto a resultá Charlson ‘Sontje’ Mercelina.
Sontje a gana tambe premio pa Mihó Bos, Mihó Aktuashon, miéntras su “Sòldá di Karnaval” a gana e premio Mihó Letra.
Zouk’aino su tumba titulá “Tumba ku tambú” a risibí premio 1e finalista Mihó Letra.
Shentily Zimmerman a risibí e premio Partisipante Mas Popular, miéntras ‘online’ tambe el a risibí mayor kantidat di voto. Premio Partisipante Dinámiko a bai pa Xiandrah Statia
i Premio Estímulo a bai pa Darlisha Valks.
Un biaha mas pabien na tur e partisipantenan, Fundashon Alelimo i Fundashon JAG pa un tremendo Festival di Tumba Hubenil.