MERKA.- Ayera un hues a disidí ku Chris Brown pa 5 aña no tin mag di tin kontakto ku su eks, Karrueche Tran, esaki despues ku Tran a hasi un petishon pa prohibí e kontakto.
Durante dje tratamentu di e kaso a lesa algun mensahe di ‘SMS’ ku Brown a manda kaminda e ta skibi ku e lo hasi e bida dje aktris imposibel. E rapper tabata presente na e tratamentu dje kaso den korte, asina e portal TMZ a informá.
Entre e mensahenan tabatin tambe algun ku tabata agresivo kaminda Chris a menasa Karrueche ku e ta dal e. Previo e tratamentu dje kaso e hues a duna Chris un prohibishon di kontakto.
Tran i Brown tabatin un relashon entre 2010 i 2015, pero nan a separá na momentu ku Brown a disidí di bolbe ku su eks amante, e kantante Rihanna. Na momentu ku e relashon ei a kibra, el a bolbe serka Tran pero esaki na 2015 a pone e rapper definitivamente riba kaya.