WILLEMSTAD.- Djasabra anochi a tuma lugá e elekshon di Reina, Prens i Pancho di Karnaval 2018. Un elekshon bon organisá ku a kana bon kaminda partisipantenan a demostrá nan talento den gran forma.
Ounke ku e evento a kaba mardugá di djadumingu, e organisashon por mira atras riba un bon evento. Un stage bunita dekorá ku a kuadra ku e tema di Karnaval 2018, Pensa, Marcha i Gosa Berde.

PRENS I PANCHO
Pa elekshon di Prens i Pancho e di dos finalista a resultá Fransel Meyers i Jonathan Evers. Nan a gana tambe ‘Premio Amistoso’ i ‘Premio Dinámiko’. E promé finalistanan a resultá Christefer Berre i Joel Villareal.
Komo Prens i Pancho 2018 a keda korona Jhuriel Plantijn i Marvion de Jezus. Aserka nan a gana premio pa Mas Popular, Trahe mas Kreativo i Premio Mihó Talento Chistoso.
Trahe mas impaktante a bai pa e duo forma pa Aldison Cadeau i Ramick Martha. Premio pa mihó preparadó a bai pa Dino Serbonij.

REINA KARNAVAL
Pa elekshon di Reina di Karnaval 2018 e partisipante Fradeleysha Martis a bai ku premio pa Reina Simpatia, Trahe mas Kreativo i Premio komo mihó diseñadó.
Khismayris Camilo a resultá e di dos finalista. Denise Janga, e promé finalista a gana tambe premio pa Reina Fotogénika, Trahe Mas Impaktante i Reina Talento.
Minister Marylin Alcalá-Wallé huntu ku presidente di Fundashon J.A.G., Juni Aniceta na final dje anochi a korona Christine Dania komo Reina di Karnaval 2018. Adishonal el a gana tambe premio pa Reina Mas Dinámiko, Reina Mas Popular, Premio pa Mihó Show i su preparadó, Gionel Virginie a gana premio pa Preparadó di Reina 2018.
Riba fotonan ku ta kompaña e artíkulo nos por apresiá tur esnan ku a keda premiá.