WILLEMSTAD.- Durante di e último dos añanan, Angelitos a logra duna su kantantenan oportunidat pa bou di guia di dosentenan profeshonal siña toka instrumèntnan musikal. Nos hóbennan talentoso a ekspandé nan habilidatnan musikal tokando riba e instrumèntnan manera piano, guitara, kuarta, blòkflùit, konga, drùmsèt i mas instrumèntnan di perkushon.
Diferente di e hóbennan aki awor ta forma parti di Angelitos su propio orkesta hubenil yamá "Framily Youth Orchestra"
E orkesta aki lo hasi su debut ofisial dia 16 di desèmber 2017 durante di un gran konsierto di Pasku titulá "Christmas with a touch of Magic".
“Framily Youth Orchestra” lo kompañá koro Angelitos durante vários di nan kansionnan.
Tambe lo tin diferente ensemble, ku ta grupito di 3 tokadó hubenil òf mas, ku lo presentá kansionnan di Pasku.
Apesar di kanta i toka instrumènt, Angelitos ta pèrkurá pa un formashon sosial basá riba disiplina, norma i balornan. Esaki ta pèrkurá pa un desaroyo aún mas positivo di nan komportashon, aktitut i sentido di disiplina.
Muchanan di Koro Angelitos,  e tienernan di VoiceMail i nos futuro músikonan di “Framily Youth Orchestra” ta preparando ku hopi entusiasmo pa nan konsierto "Christmas with a touch of Magic" ku lo tuma lugá na Teater Luna Blou dianan 16 i 17 di desèmber. Kada dia lo tin dos konsierto, di 3’or pa 5’or di atardi i di 6’or pa 8’or di anochi.
E tremendo mago, Tom Presti lo laga nos muchanan gosa un tiki mas di e Magia di Pasku. Un ambiente di alegria i harmonia, ku bo no por pèrdè.
Karchi ta optenibel na Mensing's Caminata i serka tur miembro di Angelitos , VoiceMail i Framily Youth Orchestra.
Pa mas informashon òf pedido di karchi por manda un e-mail na Ruthieangelitos@gmail.com  òf un WhatsApp na number +5999 511 8160