WILLEMSTAD.- Karanan kontentu ayera tardi den Stadion Ergilio Hato na momento ku C.A.B. (Federashon di Atletismo) di forma ofisial a risibí un kantidat grandi di material komo donashon di parti di Churandy Martina Foundation. Tabata presidente di e federashon, Caiman Douglas, kende a risibí e materialnan den presensia di Cees Ursem i Thakai Doran den representashon dje fundashon di Churandy.

Na e okashon ei Douglas a trese dilanti ku tabata durante di training di coachnan ku el a tuma nota ku atletismo aki na Kòrsou falta material di training. A hasi un apelashon na Churandy, kende mediante di su fundashon a hasi un opsekio balorá na 80.000 florin di manera ku atletanan lokal tin sufisiente i bon material pa train.

Di parti di CAB a enkargá e trainer Wigna Girigorie komo esun enkargá ku e materialnan. Ta e intenshon pa klupnan fia material pa train na SDK i dirèkt despues di training entregá esakinan bèk.

...Un bista di parti chikí dje materialnan ku Churandy Martina a opsekiá na federashon di atletismo...

Ademas di kònteinernan ku material, tambe e donashon ta enserá ekipo pa arma un sala di gym, tambe na SDK.

Mas aleu CAB a haña e hóben Chloe Nivillac disponibel pa presentá diseñonan bunita ku lo e pinta riba e kònteinernan.

Dirèkt despues dje parti ofisial, por a mira ku klupnan ya a kuminsá hasi uso dje materialnan.

...Un gym ku ekiponan nesesario pa atletanan hubenil i senior por traha riba e parti di forsa...