WILLEMSTAD.- CIFFR ku orguyo ta anunsiá e 5 nominadonan pa e di 6 edishon di Yellow Robin Award i alabes e promé 5 nòmbernan pa e di 7 edishon di Curaçao International Film Festival Rotterdam (CIFFR) ku ta tuma lugá di djárason 11 te djadumingu 15 di aprel 2018.
CIFFR ta un inisiativa di e Fundashon Kurasoleño, Fundashon Bon Intenshon i produsí den koperashon ku un di e festival di sine nan di mas grandi di Oropa: International Film Festival Rotterdam. Yellow Robin Award ku a inisiá den 2013 ta duna oportunidat na talentonan hóben di Karibe i Latino Amérika, pa desaroyá nan talento i ta un trampolin pa merkado mundial.
Ta pasa e pelíkula ganadó den e programa ‘Bright Future’ di International Film Festival Rotterdam di 2019 i durante e festival di Morelia, Mexico di e aña aki. Tambe tin un premio kèsh di USD 2.500 mará na e premio aki i un suma di USD 7.500 na desaroyo di talento pa medio di partisipashon na programa nan manera BoostNL òf Cinemart.
CIFFR ku orguyo ta anunsiá e 5 nominadonan pa e 6e kompetensia ‘Yellow Robin Award’ i asina tambe anunsiá e promé 7 título nan pa e di 7e edishon di Curaçao International Film Festival Rotterdam. Tur e 5 produktornan lo ta presente durante e festival.

BLACK MOTHER
Khalik ALLAH | Jamaica, USA | 2018 | English | n.s.
Den e dokumentario aki produktor/fotógrafo Khalik Allah (1985, VS) ta laga hamaikinonan konta di nan soño i nan sabiduria di bida, pero tambe di nan bida duru di tur dia. Na un manera honesto e fotógrafo/produktor di sine outodidakto ta laga bo sera konosí ku e Hamaikino di awe en dia. Di muchanan hóben, streetwise rappers te rastafarian, ama nan di kas, kunukero nan i mucha muhé nan devoto.

EL CHATA (The Sparring Partner)
Gustavo RAMOS PERALES | Puerto Rico | 2018 | Spanish | e.s.
Den su pelíkula debutante El Chata (The Sparring Partner) regisor Ramos Perales (1980, Puerto Rico) ta skohe esena nan di bòkseo di Puerto Rico komo punto di salida di e drama tokante di dos oportunidat i determinashon. Ku aktuashon nan espektakular i esena nan di pelea magistral e ta trata na demostrá nos ku bòkseo realmente ta duna puertorikeñonan un chèns riba mihó bida. Pero asina mes ku hopi ambishon i talento, e tentashon pa skohe e kaminda malu ketu bai tei.

HIJOS DE LA SAL (Children of the Salt)
Luis i Andrés RODRÍGUEZ | Venezuela | 2018 | Spanish | e.s.
Children of the Salt ta e di dos pelíkula di rumannan Luis i Andrés RODRÍGUEZ (1974, Venezuela). E luhoso i fasinante drama familiar aki ta tuma lugá den saliña di salú na Cumaragues na Venezuela, kaminda bida di Enrique (13) i Maria (16) despues di morto di nan tata Evaristo no ta bira mas fásil. Zonido ta un faktor masha importante den e pelíkula aki; kasi bo por sinti presensia di bientu i ola nan i e muzik ta duna e pelíkula un dimenshon realístiko mágiko.

MOKO JUMBIE
Vashti ANDERSON | 2017 | Trinidad & Tobago, USA | English | n.s.
Den e drama di amor di e Trinitario – Amerikano, Vashti Anderson, e hóben ingles Asha, di bishita serka su tanta na Trinidad ta topa ku e hóben bisiña misterioso Roger. Ei ta start un romanse i un búskeda mágiko di identidat. Un intenso debut ku ta laba entre diferente tabú, superstishon i spiritualidat.

EL SILENCIO DEL VIENTO (Silence of the Wind)
Álvaro APONTE-CENTENO | Puerto Rico, Dom. Republic, France | 2017 | Spanish | e.s.
Den su debut Silence of the Wind Álvaro APONTE-CENTENO ta mustra e parti humano, pero tambe e parti no ménos dramátiko di e krísis mundial di imigrashon. Rafael huntu ku su ruman muhé ta forma parti di un ret di trafikashon di hende, ku ta trata na yuda hende nan yega Puerto Rico. E bunita paisahe nan di Puerto Rico ta forma un kontraste skèrpi ku e tragedia nan di trafikashon di hende.

GANADOR DI YELLOW ROBIN AWARD 2017 DEN LANDHUIS BLOEMHOF
Promé ku festival, lo pasa e ganador di Yellow Robin Award 2017: El hombre que cuida di e produktor Dóminikano Alejandro Andújar den  Landhuis Bloemhof riba djárason, 28 mart próksimo pa 19:00.
Karchi optenibel na Landhuis Bloemhof. Pa mas informashon bo por tuma kontakto ku  info@bloemhof.cw | Telefòn (599-9) 737-5775
E programa kompletu lo ta konosí entrante djaweps 5 di aprel durante di e pre-view di un di e pelíkula nan di nos programa.
E buki nan di programa lo ta optenibel e dia ei na The Cinemas, Mensing’s Caminada i The Movies. Benta di karchi ta kuminsá djasabra dia 7 di aprel na The Cinemas. Via di medio nan sosial i prensa lokal lo publiká diferente título i tambe anunsiá diferente programa.