BUENOS AIRES, ARGENTINA.-E organisashon sindikal CLATE di forma kategóriko a rechasá deklarashonnan di presidente Javier Milei di Argentina den direkshon di presidente Gustavo Petro di Colombia. Milei durante di un programa di televishon a yama presidente Petro ‘komunista asesino’. CLATE a mustra repudio pa e palabranan di e presidente argentino i mesora CLATE a reforsá e lasonan di hermandat i solidaridat entre trahadónan i pueblonan di ámbos pais.

E konflikto a kuminsá durante di un entrevista ku presidente Milei mester a duna un definishon di e diferente figuranan den polítika di Argentina i Sur Amérika. Milei a fulminá kontra e presidente kolombiano.

CLATE ta e organisashon sindikal internashonal den kua ta uni trahadónan estatal di nashonnan di Amérika Latino. Sirbidónan publiko i nan organisashonnan ta uni den CLATE. CLATE ta lucha pa ophetivonan gremial komun di tur sirbidó publiko di kontinente.

For di Colombia mesora a drenta reakshon di rechaso total i enérgiko kontra e deklarashonnan di Milei. Kolombianonan ta mustra ku presidente Petro a keda elegí di manera demokrátiko i legítimo. Presidente di CLATE, Julio Fuentes a bisa ku e konfederashon i organisashonnan afiliá tur ta rechasá e deklarashonnan di e presidente argentino. ‘Milei ta kibuká si e pensa ku nos ta bai laga e akusashonnan grave aki pasa sin mas. Pueblonan di Latino Amérika i Karibe i organisashonnan ta ruman i ta traha huntu i di forma solidario den hinter e region pa konstruí e ‘Patria Grande’ manera libertadornan a soña.