WILLEMSTAD.- Despues di 16 aña, e tema “Bisami Awó”, di e talentoso artista rubiano Claudius Philips, ta mira lus. Asina e propio Claudius Philips a splika durante su entrevista na momentu ku el a lansa e tema nobo na Aruba. E piesa “Bisami Awó” ta un presioso balada.

Segun Claudius, últimamente no tin masha hopi balada bunita mas, manera ántes. “Unda e romantisismo ta?”, asina Claudius ta puntra. Aparte di ta konosí pa e tremendo ambiente i dushi ritmo ku su banda O.R.E.O., Claudius Philips ta bon konosí tambe komo un gran baladista.

E último balada baliabel ku Claudius a presentá tabata e gran éksito “Hasiendo Cos Romantico” (konosí den pueblo komo “Mi Ke Bo Paga E Lus”).
E talentoso artista tin mas kos nobo na kaminda. For di e dianan ku tras di lomba e balada nobo di Claudius Philips, “Bisami Awó” a kuminsá zona na emisoranan na Kòrsou tambe.

E tema ta original di su ídolo, Ilan Chester, ku aña pasá Claudius tabatin e privilegio di a topa personal, hustamente na Kòrsou.

E tema nobo “Bisami Awó” ta kompañá pa un bunita video clip ku ya kaba tur hende rònt mundu por mira riba YouTube. Definitivamente “Bisami Awó” ta otro hit grandi pa Claudius Philips ku sigur lo kai na agrado di su gran kantidat di fanátikonan na Kòrsou.