WILLEMSTAD.- Dia 27 di aprel próksimo, Clifton End ta na Kòrsou pa un presentashon na Brakkeput Mei Mei di su konsepto nobo, titulá 'Clifton End & Friends: Pa Mi Pais'. Despues di e produkshon eksitoso titulá ‘Mi Pais’, unda e kantante talentoso a duna un homenahe na su isla natal, Clifton ta regresá ku mas interpretashon koutivante.
Den e mes un temporada, Clifton lo lansa dos albùm simultáneamente, e desishon mas ambisioso ku e kantante a yegá di realisá. Na 2016, Clifton a firma ku e label Buzzbin Productions i a lansa su karera komo solista. Na òktober di e aña ei, ya e tabatin su promé hit di Kizomba na spañó, titulá ‘Catch & Release’. Na yüli 2017, Clifton a bolbe skor otro hit den e mes un género, titulá ‘Give it All To You’. No por lubidá Clifton su hitnan di Ritmo Kombiná ku e banda popular Cache Royale, ‘It’s all about you’, ‘Gewoonweg’, ‘Ik neem je mee’, i ‘So So Lobie’.

Clifton And & Friends
‘Clifton And & Friends’ ta un produkshon di alta kalidat ku tabata un éksito rotundo na Ulanda. E promé presentashon a tumá lugá na sèptèmber 2017, kontinuá pa un edishon di San Valentín na febrüari último. Akí, Clifton ta hinka su hitnan faborito den un bachi moderno i ta kolaborá ku diferente artista ku a influensia su ilustre karera.
Durante 'Clifton End & Friends: Pa Mi Pais' lo duna homenahe na vários baluarte den nos komunidat manera Tony Sherman, kende tambe lo kanta algun kansion. Tambe e talentoso Jill Frans, Ephrem J RayBass i Tahir lo presentá.

Albùm Nobo
Tambe Clifton ta preparando pa lansa dos albùm, e promé titulá ‘Baluarte’, kual ta un homenahe na vários di grandinan musikal di Kòrsou ku a inspir’é durante su karera. ‘Mi Pais’, ku a keda komponé pa e maestro Ced Ride, tabata e promé produkshon di e albùm akí. “Mi Pais’ ta un kantika serka di mi kurason, paso mi tabatin 12 aña so dia Ced Ride a komponé p’ami”, Clifton a splika. Despues di hopi aña, Clifton a disidí di hinka e komposishon den un bachi nobo, pa asina nos por para ketu na tur loke nos mester ta orguyoso di dje komo kurasoleño.
E di dos albùm, ku ainda no tin título, lo ta un kombinashon di Kizomba, Afro-Beat i Reggaeton. Aki, Clifton a kolaborá ku vários artista di renombre manera PutoX di Fransia i tambe Efrem J.
Karchinan pa ‘Clifton End & Friends’ ta na rason di 55 florin i ta disponibel na Tik Tak, Bruna i Mensing’s Caminada. Pa mas informashon chèk e página di Facebook/BuzzBinProductions òf mail na Media@buzzbinproductions.com