WILLEMSTAD.- Ora dos titán den mundu di entretenimentu topa otro, magia musikal ta keda krea. Ku hopi antisipashon Clifton End ta lansa su kolaborashon tan antisipá  titulá ‘Slow Dance’ ku e talentoso kantante Efrem J. Clifton semper tabata  un inspirashon musikal pa Efrem J, espesialmente na komienso di su karera musikal unda e tambe tabata militá den banda di ritmo kombiná.
“Semper nos tur dos kier a traha huntu, pero nunka tempu a permití”, Clifton a splika. E kolaborashon a keda realisá masha orgániko, ora Efrem tabata na Hulanda pa algun presentashon i a topa ku Clifton, unda porfin nan a drenta studio pa graba e produkshon ku a bira ‘Slow Dance’.
‘Slow Dance’
Ku ‘Slow Dance’, Clifton i Efrem J  ta invitá nan respektivo amor pa un baile sensual, unda nan ta splika kon nan ta deseá di tin e pa semper den nan brasa.  Nan ta invit’é pa baila e Kizomba aki pa asina nan konektá ku otro.
Segun Clifton, ‘Slow Dance’ ta un kantika ku un toke di R&B, algu ku semper Clifton ta inkorporá den su músika.  E kantika ta kombiná ingles i spañó i tabata un kolaborashon entre Clifton, Vincent ‘Junior’ da Silva i Efrem J,  kende a skibi su mes parti. Clifton ta atmití ku su proseso ku komposishon ta poko úniko, unda e ku Vincent a kuminsá ‘brainstorm’ riba e konsepto i a sinta adapt’é huntu. “Vincent sa ku ki ora ku mi graba, e tin ku laga mi na pas pa mi por hasi mi kos. Pues el a hala kita i e mes un anochi m’a graba e stèm”, Clifton a splika.
E produkto final ta papia pa su mes, un dushi interpretashon unda un i tur por basilá riba dje. “Tabata dushi pa graba un Kizomba atrobe”, Efrem a splika, despues di a profilá su mes ekstensivamente den e género di bachata. Efrem J tambe ta trahando duru pa trese mas produkshon pa su fanátiko nan lokal i internashonal. Aktualmente e ta grabando algun videoclip i ta preparando pa otro gira na Argentina i Ecuador.
Sinta Ros
Clifton End ta na Kòrsou e dianan aki pa un tremendo presentashon durante Simplicity – Tropical Edition, ku ta tuma lugá dia 9 di novèmber 2019 na Brakkeput Mei Mei i ta keda organisá pa Fundashon Sinta Ros. E fundashon ta operá kompletamente riba fondo i donashon, ta yuda e muhé ku ta enfrentando kanser di pechu na Kòrsou. Nan ta organisá vários evento henter aña pa rekoudá fondo i e fiesta di Simplicity ta birando dia pa dia mas popular. Clifton lo tei espesialmente pa duna sosten  na e noble kousa aki, huntu ku TUNE i GENTZ.
Karchinan ta disponibel serka miembronan di organisashon i na e puntonan di benta konosí.
Bo por chèk e videoclip di 'Slow Dance' riba YouTube na https://youtu.be/wgcI3IodLBM
Pa mas informashon siguí Clifton End riba ritnan sosial na e página di Facebook/BuzzBinProductions òf mail na Media@buzzbinproductions.com pa mas informashon.