WILLEMSTAD.- Clifton End a lansa otro proyekto interesante titulá ‘Mi Pais’, pa selebrá Dia di Kòrsou. Clifton a ofresé e balada bunita na Kas di Kultura, kende lo utilisá e esaki durante selebrashonnan di 10 di òktober. Riba e dia akí tambe lo estrená e video clip ku ta ekspresá nos orguyo pa nos patria. Clifton su talento musikal a keda deskubrí na un edat hóben, unda el a partisipá na diferente festival di kanto ku a atraé atenshon di grandinan den farándula. Na edat di 12 aña, maestro Ced Ride a komponé ‘Mi Pais’ pa Clifton, i p’esei e kantika ta un poko sentimental pa e talentoso vokalista. Despues di hopi aña, Clifton a disidí di hinka e komposishon den un bachi nobo, pa asina nos por para ketu na tur loke nos mester ta orguyoso di dje komo kurasoleño. Clifton ta gosa di un karera impreshonante, unda el a kreá un fanatikada fiel ku semper a sostené. Den aña ‘90, el a militá den vários agrupashon renombrá, kuminsando den e grupo di gospel Génesis, pa despues a amplia su abilidatnan den GIO Fuertísimo. Na 2001 Clifton a tumá e desishon difísil pa bandoná Kòrsou i sigui su soñonan musikal na Spaña, den e kompania di Tony Sherman. Na 2005, Clifton a muda pa London, unda el a traha un par di aña djaserka ku e famoso kantante di Soul, Freddie Lee. Despues di e periodo akí, Clifton a regresá Ulanda unda el a drenta e popularísimo Cache Royale, ku indudablemente ta un dje bandanan kurasoleño mas popular di e último dékada. Akí Clifton a interpretá éksitonan manera ‘It's all about you’, ‘Gewoonweg’, ‘Ik neem je mee’, i ‘Soso lobie’. Na 2016, Clifton a lansa su karera solista i a firma ku kas diskero Buzzbin Productions. Na òktober di e aña ei, el a lansa e vershon di ‘Catch & Release’ na spañó riba e ritmo di Kizomba. Na yüli di e aña akí, Clifton a lansa otro interpretashon riba ritmo Kizomba, titulá ‘Give it All To You’. 2018 tambe ta pinta di bira alentador ku bista pa hiba su músika internashonal. Clifton lo lansa su promé EP komo artista solista. Aki nos lo por gosa di mas interpretashon riba ritmo Kizomba ku vários kolaborashon ku artistanan di renombre den e género akí.