Atletanan femenino konstantemente ta keda molestiá

WILLEMSTAD.- Teamnan di atletismo ku ta train den SDK ya pa basta tempu a bin ta reklamá mal komportashon di hobennan siklista ku ta molestiá atleta- i coachnan den SDK. E situashon a eksplotá ayera ora un dje hobennan siklista a agredí un coach femenino dje ekipo The Eagles, lagando esaki ku un kòrtá den kara. E agreshon tabata pa e simpel motibu ku e coach a reklamá e hoben ku e no por kore ku su baiskel pasa entre e atletanan durante di nan training.
Sidney Valks kende ta presidente di The Eagles ta hopi indigná i huntu kuné e dirigentenan di tur e klupnan di atletismo ku ta train na SDK. Valks a trese dilanti ku ta kasi tur dia nan tin hopi molèster di siklistanan masha ònbeskòp dje bario, kendenan ta subi ku baiskel te hasta riba pista durante di training di atletismo. Ayera tabata e kolmo, ora ku algun di nan a subi te den tribuna ku nan baiskel na momento ku e atletanan tabata train riba trapi. E coach femenino ku a purba na impedí esei a keda agredí i a sufri un kòrtá bou di wowo. E agresor su argumento: “Ningun hende ta mishi ku mi baiskel”.
Valks a duna di konosé ku ta un situashon ku a sali kompletamente for di man. Bewakernan di SDK no por hasi nada pa impedí ku e hobennan ta drenta SDK ku baiskel. Un tempu a logra para nan pafó, pero e hobennan tabata bai na pia den stadion i tabata grita kantidat di palabra malu. “E kos ta ferfelu, pero pio ainda ku nan ta molestiá e muchanan muhe, inkluso mucha chikitu ku no ke hasi sierto ehersisio pa motibu dje gritunan hopi mahos den nan direkshon”, segun Valks a reklamá.
Den pasado dirigentenan di atletismo a reklamá, pero no tin kambio. Te hasta ora ku sera e entrada via kua e atletanan i publiko ta drenta na tribuna, e hobennan riba baiskel ta drenta den e area di kamerin i ta kore nan baiskel ei den sin ku bewaker ta para nan. Pero loke a pasa ayera, segun Valks, a kibra tur rekort di ònbeskòp ora ku e hobennan no solamente a kore ku baiskel den tribuna kaminda muchanan tabata hasi ehersisio, sino ta bai asina leu pa agredí un dama coach ku a hala nan atenshon.
Ta e intenshon pa hasi un denunsia na polis, una bes ku sa ta kua ta e hoben agresor.