Ounke e mes ta den un mal temporada

WILLEMSTAD.- E yu di Kòrsou Wladimir “Coco” Balentien ku su ekipo Fukuoka Softbank Hawks komo kampion di Pacific League na Hapon, ta hungando e Pacific League Climax Series kontra di Chiba Lotte Mariners. Ganadó dje seri aki ta bai e Japan Series kontra di Yomiuri Giants. E seri final di beisbòl hapones ta start 21 di novèmber.
Balentien a start e temporada na kabes di ofensiva di su ekipo, pero despues a bin sufri leshon i a bati den temporada regular pa apénas .174 ku nuebe homerun i 22 RBI. E yu di Kòrsou komo bateadó di poder tabata ku Tokyo Yakult Swallows for di 2011 pa 2019, pa awor e temporada aki hunga ku un ekipo grandi pero lamentablemente no a produsí loke a spera di dje.
Balentien ta konosí rònt Hapon pa e rèkòrt di homerun ku el a establesé den 2013, superando e marka di 55 homerun dje legendario Sadaharu Oh i Tuffy Rhode, ku 60 bataso di kuater skina.

“Sigur ta un aña fèrfelu”, Balentien a bisa e siman aki. “Den mi 20 añanan komo profeshonal esaki ta e promé den kua m’a ‘struggle’ asina tantu. “Pero mi ta sigui kere den mi mes. Mi mester prepará i ta kla pa ora mi nòmber aparesé riba lineup, mi sali i hasi loke mi por hasi”. E ta desidido pa yuda Hawks gana nan di kuater Japan Series Championship konsekutivo. “Personalmente no tabata un gran aña p’ami, pero kos no a kaba ainda. Nos tin e Climax Series i tur kos por kambia i mi ta bira parti importante dje team den playoff. “Mi ta den un team ganadó i mi ke ta parti dje triunfonan. Si bo no hunga, bo no a yuda den e triunfo” “Si bo ta den un team ganadó, e hendenan ta mira bo komo ganadó. Pero ami personalmente gusta kompetí. Mi ke kompetí tur anochi” El a bisa mas aleu ku Softbank ta un organisashon ku ta pone su metanan hopi haltu i e ta komprondé nan filosofia. “Tur kos tin di aber ku ganamentu, nan lo hasi tur kos pa gana. “No ta importante ken bo ta i kiko b’a hasi. No ta importante ki tipo di pelotero bo ta. Si bo no ta yuda e ekipo pa gana, nan ta kambia bo i pone un hungadó ku por hasi e trabou”.