CARACAS, AP.- Colombia a rechasá e akusashonnan di presidente Nicolás Maduro indikando ku Bogotá ta impliká den “atakenan informátika” kontra e sistema eléktriko di Venezuela, kual a provoká un serie di blackout desde komienso di mart.
“E akusashonnan aki ta pa konfundí e opinion públiko i enkubrí e responsabilidatnan di e régimen ilegítimo ku Nicolás Maduro ta enkabesá den e krísis multidimenshonal ku Venezuela ta pasando aden”, segun e Ministerio di Relashon Eksterior di Colombia den un komunikado.
E reakshon di presidente Ivan Duque su gobièrnu a tuma lugá dos dia despues ku Maduro a denunsia ku e “atakenan informátika” pa “daña” e sistema eléktriko venezolano a originá desde Chile i Colombia.
Colombia, entre e mas di 50 paisnan ku a rekonosé e lider opositor venezolano Juan Guaidó komo presidente legítimo, a aklará den e dokumento ku Venezuela ta pasando dor di un krísis di emergensia humanitario kompliká i ku esaki ta evidente “dor ku e sistema di koriente a kolèps”.
Desde 7 di mart, na momentu ku e pais a registrá un di e blackoutnan mas pió den historia di Venezuela, Maduro a denunsia na vários okashon ku ta trata di atakenan dirigí pa Merka.
Ekspertonan ta bisa ku e fayonan repititivo ta dor di un atministrashon korupto ku no tin e kapasidat pa mantené e sistema eléktriko nashonal. Nan ta deskribí e instalashonnan komo “kasi na ruina”.
