WILLEMSTAD.- Joshua Zimmerman sigur ta keda kòrda su debut den selekshon aki na Kòrsou. E hóben ayera nochi a skor tres gol den ménos ku dies minüt di wega i tabata klave den viktoria di 5-0 di selekshon di Kòrsou riba Saint Martin den torneo di klasifikashon pa final di CONCACAF U-20.

Kòrsou v/s Saint Martin (franses) den e promé parti tabata wega di un banda i e wega a sosegá 4-0. Pero den di dos tempu direpente e team bishitante ta drecha su kalidat di wega i ta duna resistensia. Tabata te den último sekòndenan dje partido ku a marka e skor final di 5-0.

Manera menshoná, Joshua Zimmerman tabata e figura grandi ku golnan na di 2, 4 i 8 minüt di wega. Na di 13 minüt Tyrese Noslin ta pone e skor na 4-0.

Ora a kere ku e goliada lo bira algu hopi mas grandi, Saint Martin ta logra kontrolá su wega un tiki miéntras ku Kòrsou tabata monta atakenan pero kada bes keda kòrtiku.

E kiper Sean Richardson di Saint Martin ku tabata hopi insigur den promé tempu, a kuminsá lusi ku konfiansa, inkluso ta para un tiru penal.

Pero finalmente den 90+ Lentini Caciano ku a drenta wega ta marka e skor final di 5-0.

Guadeloupe 6, Belize 0.

E fransesnan karibense di Guadeloupe a golia Belize na nan antoho. Un resultado di 6-0 ku ta duna indikashon bon kla ku Guadeloupe ta e ekipo kontra kua Kòrsou tin ku bringa pa esun úniko puesto ku tin pa klasifiká pa e buèlta final di CONCACAF U-20. E wega ei lo tuma lugá djasabra.

Promé ku esei, mayan atardi 16:30 lo tin e partido entre Guadeloupe i Saint Martin, siguí pa e wega entre Kòrsou i Belize.

...E ekipo franses karibense di Saint Martin ku ayera nochi mester a rekonosé e superioridat di Kòrsou...

...Kuerpo arbitrahe ku na kabes e kanades Pierre-Luc Lauziere (di dos na man drechi)...

...Momento ku Joshua Zimmerman a habri e skor na di dos minüt di wega...

...Selebrashon serka hungadónan di Kòrsou...

...Kiper Sean Richardson di Saint Martin ta bai laria...

...Mas gol di Kòrsou? No, e defensa ta saka e bala riba linia...