WILLEMSTAD.- Bailarin no ta papia riba tarima. A lo ménos no ku nan boka. Nan ta papia ku moveshon, ku  nan kurpa, ku nan ekspreshon i ku nan bista. Esei nos por a nota durante e presentashon anual di FinaDanceArtSchool i Simia Dance Company.
Den e presentashon, titulá “Conversations”, nos por a apresiá 15 koreografia, tantu ku hóben prinsipiante – e chikitunan tuti — te ku adultonan i alumno ku pronto lo tende nan resultado di èksamen final di skol avansá, manera e dos hóben bailarin ku despues di fakansi lo kuminsá na e akademia di baile na Rotterdam, Ulanda.
E presentashonnan, riba 8 ku 9 di yüni den Teatro Norman de Palm, a kuminsá fuerte ku un koreografia di Romy Schoutese. Riba muzik di Jean-Philippe Rameau, e bailarinnan a forma grasiosamente diferente figura geométriko estilo klásiko i neo-klásiko, ekspresando beyesa i elastisidat korporal, demonstrando alegria ágil, markando e pasonan kompliká, aparentemente sin difikultat, ku un sonrisa a la Mona Lisa riba nan kara.
Un kaleidoskop impreshonante di mas ku 50 studiante mustrando nan abilidat.
Koreografianan teatral i humorístiko di Daniek van den Eijnden tabata varia ku esnan di Schoutese, algun di nan ku muzik inovativo i otro ku muzik mas konosí.
Pa e koreografia ku ta karga e mesun título di e presentashon, “ Conversations” Schoutese a usa un tokadó di djémbé den e persona di Ernie Gregorius. E tabata move meimei di e bailarinnan tokando riba su djémbé, komo si fuera un kombersashon. Despues di e koreografia humorístiko di Felida, ‘Art do Matters’ a sigui e koreografia mas “sofokante” di e anochi: RUN, tokante e problema aktual di refugiado, ku un konsepto skibí pa Fina. Un koreografia dinámiko, ku akshon konstantemente , un variashon di bailarin hóben, adulto, i chabelita riba tarima. Ku asistensia di Schoutese i van den Eijnden a logra traha e koreografia, kaminda baile, proyekshon di imágen kompositá pa Pitopolo i e músika a traha un piesa teatral impreshonante. Esaki ta prueba ku imágen, baile, muzik i teater por ekspresá mas ku mil palabra.