Rumbo pa Baranquilla 2018

WILLEMSTAD.- Eksaktamente 20 aña pasá el a gana medaya di oro den deporte di bela di Weganan CAC na Maracaibo, Venezuela, ounke su disiplina deportivo mes a tuma lugá na Punto Fijo. Binti aña despues e tei atrobe i ademas di un karera sumamente eksitoso den su deporte preferí, e ta miembro di Salon di Fama di FDOK. Ta trata di Cor van Aanholt.

Cor ta para na kabes dje famia Van Aanholt ku t’asina eksitoso den e deporte di bela.

E veterano deportista ketu bai tin e entusiasmo nesesario. “Algun luna pasá a tuma lugá netamente na Colombia e Kampionato Suramerikano di bela, ku partisipashon di paisnan grandi den deporte manera Argentina i tambe Merka komo pais invitá. “M’a finalisá na di 7 puesto, pero mi tabata nr. 3 entre e partisipantenan di Karibe. “Esei no ta nifiká ku sin mas lo mi gana bròns awor aki, pero si e ta un indikashon ku mi tin e nivel”, segun Cor van Aanholt a komentá, agregando ku “kisas mi gana plata of te hasta oro”.

Su seshonnan di training den laman di Spaanse Water ta bai bon. Miéntras ku tin sufisiente bientu, tur kos ta oké.

Cor ta kòrda su partisipashon di binti aña pasá na Punto Fijo. “Tabata un tremendo pelea entre ami i cubanonan. Bon mirá nan tabata profeshonal, pasobra ta esei so nan tabata hasi hinter dia. Nan a presentá ku kurpa sumamente fuerte, pero m’a logra gana”.

E kompetensia di bela ta algu pisá. En total seis dia riba laman, tur dia ku 2 pa 3 kompetensia. E partisipantenan ta start riba un linia imaginario, entre dos ‘boei’. Bo tin ku nabegá bai i bin bek i esun ku yega promé ta haña 1 punto, seguidamente e di dos ta haña 2 punto, 3 punto, etc. Na final dje kompetensia, ta esun ku a akumulá ménos punto (nó mas punto!) ta e ganadó.

Pa loke ta trata desaroyo dje deporte di bela aki na Korsou, Cor a trese dilanti ku awendia tin hopi talento hubenil. “Lo yega e dia ku nan ta gana mi. Awor aki ta mi eksperensia a yuda...nos ta bai pa oro”, segun Cor van Aanholt a konkluí.