WILLEMSTAD.- Durante di un rueda di prensa ku a tuma lugá djaluna atardi na The Movies, Coridja Stars Productions a presentá otro mahestuoso proyekto pa seya historia di nos fiesta máksimo kultural Karnaval.

Presidente di Coridja Stars Productions, sra. Corrine Djaoen-Genaro, a konta ku e la usa tur su energia i amor ku e tin pa e fiesta, pa realisá tantu e buki komo e pelíkula.

‘E kombinashon aki lo yuda informá, forma i eduká generashonnan ku ta sigui. Nos komunidat lo keda benefisiá  pa medio di un resúmen i kompilashon di kon tur kos a kuminsá i desaroyá den e goya ku nos tin, nos kos, nos kreashon, nos orguyo "Kurason di un Pueblo".

Sr. Norwin Pieternella a bini ku e título di e obra skibí “Kònfèti i skèrpentina”

Kònfèti i skèrpentina ta inspirá riba e punto di bista festivo, kaminda den selebrashon un eksploshon di alegria ta kulminá den un yobida kolorido, dòrnando kualke espasio será òf públiko. Kònfeti i skèrpentina for di inisio i te ku presente ainda ta keda usá den nos máksimo ekspreshon/ selebrashon di alegria, Nos Karnaval i entre nan historia i rekuerdonan bunita ta keda bibu.

Mas aleu sr. Pacheco Domacasse a splika su motivashon pa partisipá na realisashon di e proyekto: Permití mi formulá mi motivashon pa partisipá na realisashon di e proyekto ‘Historia di Karnaval di Kòrsou’ di e siguiente manera:

Ta trata aki di dokumentashon di proseso evolushonario di historia di karnaval di Kòrsou den transkurso di tempu; un proseso ku sin duda por ser konsiderá komo un di e hazañanan popular i sosio-kultural mas importante di Pueblo di Kòrsou e último 10 dékadanan. Riba su mes dokumentashon ta di gran importansia, pasobra e ta informativo-edukativo i konsekuentemente ta ampliá konosementu riba sierto tereno spesífiko. Esaki na su turno ta kondusí na formashon di un mihó opinion i balorashon korekto di importansia di sierto realidat òf fenómeno.

Pa loke ta trata e obra ‘Historia di Karnaval di Kòrsou’ a hasi e máksimo esfuerso pa intensifiká e benifisionan di dokumentashon deskribí, dor di proyektá historia evolushonario di nos Karnaval den un konteksto mas amplio i dimenshonal. Esaki pues, lo aportá na un konosementu mas detayá i konsekuentemente mas kla i kompleto di e tópiko konserní. Den e kuadro aki a krea struktura di e obra riba e siguiente partinan básiko: Evolushon di karnaval for di fiestanan popular na Oropa Antiguo; Orígen di e nòmber ‘karnaval’ na Roma Antiguo; Yegada di karnaval na Kontinente Merikano; Plamamentu di Karnaval den Suramerika; Orígen di Karnaval Karibeño na Trinidad & Tobago i Evolushon di karnaval na Kòrsou.

Coridja Stars Productions ta gradisí su patrosinadó i sostenedónan ku ta: Curaçao Tourist Board, Medical Laboratory Services, Vertegenwoordiging van Nederland, Curacao Airport Holding, Curacao Ports Authorithy, UTS, Diamonds Casino Maduro & Curiel’s Bank, Bureau Telecommunicatie & Post I Dutch Caribbean Air Navigation Services.

Coridja Stars Productions ta spera ku Pueblo di Kòrsou lo tin momentonan ameno i edukativo den seno familiar, sosial i/o karnavalesko.

Tantu e buki komo e pelíkula lo estrená na Kòrsou dia 4 di febrüari 2021. Karchi lo ta na benta for di 1 di yanüari 2021 na The Movies Curaçao.