Gana un instalashon kompleto di pènel solar na bo kas!

SAMBIL—Ayera den Studionan di KONTENTU na Sambil, Cpost ofisialmente a lansa nan Kampaña Kopa Mundial 2026. CEO, Jervhes Josephia a anunsiá lansamentu di e kampaña ofisialmente durante un rueda di prensa.

E kampaña multi asosiá ku diferente sosio, tin komo meta pa selebrá e klasifikashon históriko di Kòrsou na kopa Mundial 2026. Alabes Cpost ta buska na akapará atenshon di su klientela i krea mas envolvimentu “on-line” pa nan servisionan logístiko.

E kampaña Kopa Mundial 2026 Cpost, ta enserá entrega di premionan mensual. Kompanianan asosiá, Fun Miles, ACU, Omni, Terra Control i Kontentu Media, ta duna aporte pa hasi e premionan posibel. Ta trata di premionan grandi i atraktivo manera Smart Tv’s, èrko, giftcards i Fun Miles. E premio gordo ta un instalashon kompleto di pènel solar na kas di Terra Control. E klientenan ku ta yega na remarke pa partisipashon mester tin por lo ménos 10 pedido pagá (Air Way Bills). E partisipashon ta bálido durante durashon di e kampaña.

CEO, Jervhes Josephia, durante su introdukshon, a splika na nòmber di maneho di Cpost, ta un gran plaser pa anunsiá, lansamentu ofisial di nan kampaña titulá “World Cup Campaign 2026”. Adishonal el a hasi uso di e oportunidat pa informá un momentu adishonal di selebrashon, pa motibu ku nan a klousurá tres kampaña eksitoso: 1. Shop, Ship & Cruise unda e ganadó por disfrutá di un biahe krusero  pa 2 persona. 2. Shop & Fly  ku ta enserá un biahe pa dos persona pa Oropa. 3. Shop & Jump unda e ganadó a risibí XCG 1,500 kèsh pa su trahe den un grupo di karnaval di su eskoho. E premionan menshoná a keda entregá ayera tambe.

Señor Josephia a splika alabes ku 2025 tabata un aña hopi positivo pa Cpost su servisio di “online shopping” kual ta PuntoMio i EuroMio. Komparando e volúmen di 2025 ku 2024,  por bisa ku Cpost a bolbe krese ya pa dos aña konsekutivo ku dòbel digito. Manera ya konosí kaba, na Kòrsou mas ku 90% di tur produkto di konsumo ta ser importá. Ku e konosementu aki den mente, for di aña 2001, Cpost ya tabata aktivo den e-commerce i pa proveé solushonnan logístiko.  Den luna di desèmber 2025,  a surpasá e kantidat di 10.000 pakete i esei ta un muestra ku na momento ku un kliente pensa pa hasi online shopping, Cpost sigur ta e kompania di eskoho.

Ku e “World Cup Campaign 2026,” Cpost no ta papia solamente di premio, sino di futuro. E premio prinsipal ta un sistema di pènel solar kompletamente instalá na bo kas. Esaki, pa abo komo felis ganador, ta nifiká:  sostenibilidat, redukshon di gastu,  komfort i  responsabilidat ambiental. E periodo di e kampaña ta di 1 di febrüari 2026 te ku 24 di yüli 2026. Den un aña kaminda nos pais lo ta parti di e “FIFA World Cup 2026,” unda nos ta uni deporte, inovashon i orguyo nashonal den un solo eksperensia.