WILLEMSTAD/PHILIPSBURG – Centrale Bank van Curaçao en Sint Maarten (CBCS) ku plaser ta anunsiá ku a drenta un kolaborashon ku Crane Currency i Royal Canadian Mint pa produkshon i suministro di plaka di papel i moneda, respektivamente, di florin karibense. Esaki ta otro paso importante riba kaminda pa yega na un moneda nobo pa e paisnan Kòrsou i Sint Maarten, manera a palabrá den kuadro di e reforma konstitushonal di 10-10-2010. Tur dos ta empresa altamente renombrá i CBCS ta konvensí ku e kolaborashon ku nan lo resultá den un serie di moneda i biyete modernísimo ku pueblo di Kòrsou i Sint Maarten lo ta orguyoso di dje.

Na kuminsamentu di 2022, e dos paisnan a ratifiká e desishon pa sigui ku e trayekto pa introdusí un moneda nobo pa e union monetario; un proyekto ku lo enserá un suma di aproksimadamente NAf 15 mion. Na sèptèmber di 2022, CBCS a reinisiá negosiashon pa skohe e suministradónan di biyete i moneda. Na tur, shete suministradó a ekspresá interes pa traha ku CBCS riba diseño i produkshon di e biyete- i monedanan nobo. CBCS a evaluá e ofertanan rigurosamente a base di e kriterionan predefiní i a skrin tur e empresanan partisipante. Finalmente, e kontratonan pa e biyete- i monedanan nobo di florin antiano a bai pa Crane Currency i Royal Canadian Mint, respektivamente.

Crane Currency (Crane), fundá na 1801, ta produsí material pa plaka di papel i elemento di siguridat, i ta suministrá plaka di papel na mas di 50 banko sentral rònt mundu. Su sede ta na Massachusetts, Estádos Unídos, i su sentronan di produkshon ta na Malta i Suesia. Crane ta suministrá plaka di papel i elemento di siguridat na Tesoreria estadounidense (US Treasury Department) for di 1879 i e no ta deskonosí den nos region. Entre otro, nan a yega di suministrá plaka di papel, material pa plaka di papel i elemento di siguridat na Banko Sentral di Mexico, Guyana i Chile. Fuera di esei, na 2019, nan a suministrá e biyetenan nobo di nos hermana isla Aruba.

The Royal Canadian Mint (RCM), fundá na 1908, ta un empresa di gobièrnu enkargá ku produkshon i distribushon di moneda di sirkulashon kanades. RCM ta un di e kasnan di moneda mas grandi na mundu. Ademas di moneda kanades, e ta produsí moneda pa 80 otro pais. Den nos region, RCM a suministrá moneda na Banko Sentral di Bahamas, Barbados, Trinidad & Tobago i Guyana, i na Eastern Caribbean Central Bank.

Awor ku a firma akuerdo ku ambos empresa, e esfuersonan lo konsentrá riba e detayenan di diseño di e moneda nobo. Mientrastantu, ta preparando konsepto di kambio di lei* pa por presentá esakinan na e Paisnan na su debido tempu.

Logístika i komunikashon ta dos faktor krusial pa e proyekto. Komunikashon ta nesesario pa, na e momentonan klave, tene komunidat di Kòrsou i di Sint Maarten na altura tokante desaroyo di e proyekto pa introdukshon di florin karibense. Den e kuadro ei, a reinisiá e ronda di konsulta ku e bankonan komersial i demas partidonan interesá. CBCS a hiba kòmbersashon ku e bankonan komersial na Kòrsou i Sint Maarten riba e adaptashonnan ku lo mester tuma lugá na nan sistemanan di prosesamentu di plaka kèsh i pago elektróniko, relashoná ku introdukshon di florin karibense. Segun ku e momento di introdukshon di e moneda nobo ta yega serka, lo intensifiká e ronda di konsulta i e kampaña di informashon.

Manera a publiká anteriormente, e tasa di konvershon lo ta 1 pa 1. Ku otro palabra: e klientenan lo risibí 1 florin karibense pa kada 1 florin di Antia Hulandes. E tasa di kambio ku dòler estadounidense lo permanesé meskos.

E intenshon ta di introdusí florin karibense den e di dos mitar di 2024. Na su debido tempu, lo palabrá e fecha eksakto ku e Paisnan i informá públiko al respekto.