WILLEMSTAD.- Kòrsou su Karnaval lo ta kargá ku selebrashon durante 2020, 50 aña Karnaval di Kòrsou, 50 aña Festival di Tumba i pa koroná e aña yená ku selebrashon aki Grupo di Karnaval “Crazy Diamonds” tambe lo selebrá 20 aña di eksistensia.
Durante di e binti añanan aki e grupo a sòru pa mantené su nòmber ounke tur tipo di sirkunstansia ku por a presentá. Semper ku e mesun ambiente i goso, briando den gran marchanan di Karnaval di Kòrsou.
Pa e selebrashon di 20 aña di eksistensia di Crazy Diamonds un tema diferente a wòrdu skohé pa por selebrá den grandi e logro aki kual ta: “ The Magic of Chakras”.
E tema lo ilustrá e balansa i energia ku ta biba den kurpa di un karnavalista ilustrando e wil di koló di chakra. Kada koló di chakra tin nan nifikashon i punto den e kolumna vertrebral di kada karnavalista.
E 7 kolónan di chakra a wòrdu elaborá p'asina duna e balansa i nifikashon den e trahe. E wil di chakra ilustrando e kolónan Lila, Blou, "Turquoise", Bèrdè, Hel, Oraño i Fuksia ta visibel den trahe i piesa di kabes (headpiece).
Na mes momento tur kos den bida mester tin e balansa, ‘yin i yan’, e bon i malu. P'esei e koló pretu i blanku ta forma e base di e trahe.  P'e toke final hopi stenchi i brio a wòrdu usá pa ilustrá e lus i magia di djamanta den e trahe di Crazy Diamonds 2020.
En bista ku nos ta den un selebrashon total Crazy Diamonds kier a duna e oportunidat  na personanan ku ta interesá pa partisipá k'un "Early Bird special". Esaki ta válido si bo paga bo kontribushon promé ku 7 di desèmber 2019, pa solamente 950 florin. Despues di e fecha ariba menshoná, e preis normal lo ta 1150 florin. Pa studiante te ku 23 aña ku ta disponé di un komprobante di e aña eskolar 2019/2020 tin e oportunidat pa partisipá pa un preis spesial.
Si bo ta deseá mas informashon bo por app libremente na 693-1313 i asina risibí tur informashon. Bin gosa di e ‘Magic of Chakras’ ku Crazy Diamonds den Karnaval 2020.