WILLEMSTAD.- Mañan anochi, Crossover Youth Music Foundation, (C.Y.M.F). lo tin su ‘Annual Grand Concert’ abordo di e barku Freewinds.  Konsierto ta di 8 or pa 10 or di anochi.
C.Y.M.F. ta konosí pa su konsiertonan di nivel. Konsiertonan kaminda Kòrsou henter por sera konosí ku talentonan nobo i sinti bu orguyoso di ta yu di Kòrsou.
E fundashon musikal aki bou di direkshon di e maestro vokalista, mr. music, Toni Worrell, pa 24 aña kaba ta formando talentonan na un nivel internashonal.
Bin bo tambe, bin gosa di kantantenan manera Vienna Maduro, Evan Huerta, Dwight de Windt, Roxenia Rozal, Kim Maria, Jessica Keetelaar, Ellen Klok, Georgegino Eisden, Gayle Harry i e formashon harmóniko Face2Face.
‘Starlight Lounge’, e sala di konsierto di Freewinds, lo pone bu sinti bu manera na Las Vegas, e diversidat musikal i  nivel asombroso di e kantantenan ta kaba di koroná e obra.
Freewindsband ku su elenko internashonal di músikonan, kompañá pa NGN brass lo hasi bo eksperensia kompleto. P’esei bo no por pèrdè e ‘Annual Grand Concert’ di C.Y.M.F.
Bo kumpra karchi delantá, bo ta paga solamente 25 florin.  Djaluna 12 i na porta e karchinan lo ta 30 florin. Pa mas informashon i reservashon, bo por yama 528-2404, 677-6497 o 465-3582.