LA HABANA, CUBA, AFP.- Un total di 381 manifestante ku a partisipá den e protestanan di 11 i 12 di yüli aña pasá a wòrdu kondená pa vários delito na Cuba, inkluyendo 36 ku a haña kondenanan di te ku 25 aña den prizòn pa rebelion kontra gobièrnu, segun informashon di fiskal General djaluna.
E protestanan di 11 di yüli a laga un morto, desénas di herido i mas di 1.300 detenido, di kual ainda sentenáres ta den prizòn, segun organisashon sivil di Hustisia 11J.
Fiskal a bisa den un komunikado ku te ainda “a kondená 381 persona, inkluyendo 16 hóben di entre 16 i 18 aña, prinsipalmente pa delito di rebelion, sabotahe, robo, violensia, atentado i desòrdu públiko”.
E sentensianan ta definitivo, mirando ku e 381 personanan aki a apelá den Tribunal Supremo.
Gobièrnu a informá riba 25 di yanüari ku 790 persona, inkluyendo 55 menor di 18 aña, a wòrdu demandá pa e manifestashonnan di yüli.
Outoridatnan ta afirmá ku e manifestashonnan, un di esnan di mas grandi riba e isla desde triunfo di e revolushon na 1959, a wòrdu organisá for di Merka.
