WILLEMSTAD.-  Ku orguyo organisashon di Curaçao Baseball Week 2024 (CBW) ta mira bèk na un siman eksitoso ku ta kontribuí na desaroyo di beisbòl na Kòrsou. E aña aki CBW a konta ku partisipashon di 956 mucha, 101 coach i 18 umpire. Un logro grandi pa CBW komo ku tur aña di nobo nos komunidat ta demostrá e interes i ku beisbòl ta den nos DNA.

Segun ta keda tres’é dilanti, pa e grandinan den beisbòl CBW 2024 tabata un siman yen di energia positivo. Mucha, coach, umpire, mayornan i tur presente a laga nos grandinan den beisbòl sinti e orguyo. Tantu e grandinan di Kòrsou komo esnan ku a kompañá for di otro pais, a papia ku elogio di e eksperensia aki. Ku partisipashon di Dusty Baker i Xander Bogaerts entre nos grandinan, tur presente a gosa di por a mira e grandinan di aserka.

E klínikanan pa muchanan, coachnan i ku umpirenan ku ta e base i esensia di CBW tabata un éksito sin duda. Muchanan di tur nos timnan na Kòrsou a siña i perfekshoná nan konosementu di beisbòl. Ku gran entusiasmo e muchanan a sigui instrukshonnan, demostrá nan abilidat i hasi pregunta riba e vèltnan di Tio Daou Ballpark i Didi Deeds Field.

Tambe mester menshoná ku e Home Run Derby ku a tuma lugá na Bam Bam Tech Sports Zone tabata bon bishitá pa mira kon Mairoshendrick Martinus a bai ku e título máksimo. Shakir Albert a duna bon bataya kedando na di dos lugá.

Riba e último dia di e siman, e Celebrity Charity Golf Tournament a pone chèri riba e bolo. Tur grupo ku a partisipá a eksperensiá un dia kargá ku gòlf i goso. E subasta tabata tremendo pasó a rekoudá fondo pa por kumpra mas material pa nos timnan di beisbòl lokal. Na final a sera e dia ku anunsio di e tim ganador: ‘Local Market’ ku su miembronan Kris Williams, Calvin Maduro, Edson Kelly i Andruw Jones.

E tim aki a gana e premio pa dia 30 di aprel próksimo biaha pa Miami i presensiá e partido di Miami Marlins kontra Colorado Rockies. Despues di e partido, e ganadónan por disfrutá di un dinner huntu ku Hensley Meulens aya na Miami.

Tur aña di nobo CBW por konta ku spònsernan ku ta kere den e proyekto. Un danki spesial di kurason na: MVP Foundation, Curaçao Tourist Board, Renaissance Wind Creek Curaçao Resort, PRGV, MCB, Curaçao Airport Holding, Enterprise Rent-A-Car, Atlantic Spine Center, Coca Cola, MLBPAA, MLB, Sandals Royal Curaçao, Profound, Built Different, Brent de Graaf, De Palm Management, Lovers, Old Quarry Golf Course Curaçao, The Wine Factory, Kyoto, Heineken, The Pit Smoker, Osteria Rosso, Ròm Tambú, La Casa del Habano, 8 The Experience, Bottles, Trupial Inn Hotel & Casino, Kome Restaurant, Ultimate Automobiles (BMW), Blue Maxx, Fresh., Mustashi Barbershop, Aqualectra, Kompania di Tou Kòrsou (KTK), DeliNova i Café Barista.

Di parti dje organisashon, un danki spesial na tur ku di un òf otro manera a sostené e proyekto. Danki na Kòrsou pa karga e proyekto aki di forma espektakular. Keda pendiente di e website www.curacaobaseballweek.com i páginanan sosial (Facebook i/òf Instagram) pa informashon di siguiente Curaçao Baseball Week.