WILLEMSTAD.- Edishon nr. 12 di Curaçao Baseball Week ta start awe den oranan di atardi den Tio Daou Ballpark. Pa e edishon 2024 e evento grandi aki organisá pa Hensley Meulens i su ‘crew’ ta konta ku dos invitado di un karera largu den Major League Baseball: e veterano manager Dusty Baker i tambe e umpire ku 24 aña di eksperensia, Larry Young.

Curaçao Baseball Week su enkuentro ku prensa ayera tardi na Fort Amsterdam den tur sentido di palabra tabata algu grandioso. Manera a keda anunsiá, pa e edishon aki no ménos ku 754 mucha i hóben a inskribí pa e evento, repartí entre peloteronan di Aruba, Boneiru, Merka i Kòrsou. Ademas di e klínikanan pa e diferente gruponan di edat, tambe pa promé biaha lo tin un klínika pa umpire, pa kua te ku ayera tabatin 20 inskripshon. Tambe lo kontinuá ku e klínika pa coachnan.

Loke semper ta duna un toke adishonal interesante na e aktividat aki, ta e partisipashon di nos peloteronan profeshonal. Vários di nan lo ta presente, entre kua Ozzie Albies, Andrelton Simmons, Cedanne Rafaela i otronan, komo tambe peloteronan profeshonal di isla ruman Aruba.

Hensley Meulens a trese dilanti ku pa e edishon aki tin un kambio den e parti di entrega di material. E kambio ta enserá ku a pone na konosementu di ekiponan ku nan t’esnan ku mester bisa ki tipo di material nan ta deseá, i e organisashon lo sòru pa kada organisashon por risibí e loke nan tin mester.

Klínikanan:

Awe ta start ku e seri di klínikanan, ku esun Senior di 2 or pa 5 or na Tio Daou Ballpark. Tambe anochi 7 or lo tin e klínika pa umpire i coach, tambe na Tio Daou.

Djárason 4 ta toka na Minor i Little, tambe di 2or pa 5 or na Tio Daou, miéntras ku djaweps 5 ta muda pa vèlt di Didi Gregorius na Tera Korá, pa muchanan di 6 pa 8 aña.

Tambe djaweps anochi 7 or lo tin ‘homerun derby’ na Bam Bam Sport Zone i finalmente dia 6 di yanüari e Celebrity Golf Tournament.