WILLEMSTAD.- E di 6 edishon di Curaçao Color Walk ta sigui, bou di un aliansa nobo entre Ronald McDonald House Charities (RMHC) i JCI Dutch Caribbean ku nan patrosinadó prinsipal Maduro & Curiel’s Bank (MCB).
Komo organisashonnan “non-profit”, ámbos partido tin meta komun, esta pa kontribuí na un mihó bienestar di nos komunidat. E union akí ta garantisá kontinuashon di e tremendo evento akí pa hopi aña mas.
Ambos  organisashon ta sumamente kontentu ku e partnership nobo pa Curaçao Color Walk i ta sigur ku partisipantenan lo gosa di e magno evento positivo pa henter famia, ku lo ta yen di koló, músika i ambiente tur afó.
“Curaçao Color Walk - Color Your Life” lo tuma lugá dia 2 di yüni 2019 i lo hiba e ruta ku ta kuminsá i terminá na Parasasa Beach. E kaminata lo start 7:00 di mainta i riba e ruta por konta ku vários "fun station" kaminda e partisipantenan lo wòrdu di "splash" ku diferente koló di puiru i kada “station” lo tin su propio sorpresa pa krea e ambiente total pa tur partisipante.

Na final di e ruta lo tin un kulminashon ku animashon di músika, baile i tambe e gran "Color Splash" ku semper ta trese hopi alegria. Di e manera akí ke trese pueblo huntu pa asina yena nan mundu ku koló, i nan kurason ku positivismo.
E patrosinadónan pa ku e diferente “station” nan e aña aki lo ta MCB komo nos patrosinadó prinsipal, i e demas “color station” patrosinadónan  KFC, Subway, Pizza Hut, Fun Miles, Landsloterij i van den Tweel Supermarket. Tambe ta konta ku sosten di Total Services pa e parti di  limpiesa.
E organisashon ta sumamente agradesido pa e sosten di kada un di e kompanianan akí. Bini ku hinter famia na e kaminata i asina koperá ku dos organisashon ku ta krea impakto positivo den nos komunidat.
Benta di T-shirt lo tuma lugá na van den Tweel Supermarket Zeelandia  di 9 am pa 6 pm i na Sambil entrada Cas Abou di 10 am pa 7 pm, kuminsando e wikènt di 4 i 5 mei próksimo. Sigui CuracaoColorWalk riba Facebook i Instagram Curaçao. Colorwalk  pa mas informashon.
RMHC su meta ta pa krea i duna aporte na programanan i proyektonan ku direktamente ta kontribuí na un mihó salú i bienestar di nos muchanan i nan famianan manera por ehèmpel Ronald McDonald Family Room na SEHOS, diferente programanan ku ta kontribuí pa muchanan ku mester haña tratamentunan den eksterior i tambe esfuersonan hasí pa ofresé yudansa na e departamento infantil di SEHOS.

JCI ta un organisashon mundial ku tin komo meta ofresé oportunidat di desaroyo ku ta empoderá hóbennan entre 18 pa 40 aña pa di e forma ei trese kambio positivo den nan komunidat. Miembronan di JCI ta traha riba nan desaroyo personal i na mes momento, komo siudadanonan aktivo, ta ehekutá proyektonan ku ta trese solushon duradero pa retonan den nos komunidat.