WILLEMSTAD.- Despues di un temporada sumamente eksitoso di Miss Curaçao Teenager, International Beauty and Fashion Foundation (I.B.F.F.) ta pará dilanti un reto nobo kual ta e sertámen infantil ‘Curaçao Mini Beauty International 2017’.

Curaçao Mini Beauty International 2017 ta un sertámen infantil ku ta enfoká riba un kompetensia sano pa nos muchanan, kaminda nan ta bin kompetí, dibertí i mas importante ainda, siña.
I.B.F.F. su punto di salida, ta traha riba un fundeshi di edukashon sólido pa tantu mucha komo hóben.

Durante e periodo di preparashon ku lo dura 4 luna e partisipantenan lo risibí diferente charla edukativo den kua nan lo siña mas di nan mes pero tambe di tópiko i situashonnan ku ta presentá diariamente den nan bida, esakinan ku e meta pa den futuro nan por pone tur loke nan siña den práktika ku lo ta na benefisio di nan mes pero tambe pa nan komunidat.

E sekshon edukashonal lo ta na enkargo di personanan aktivo den mundu di enseñansa i ku tin e konosementu i eksperensia amplio den traha ku mucha.
E promé sertámen preliminar lo tumá lugá dia 3 di sèptèmber i lo hiba e tema ‘Fantasia’ i pa dia 5 di novèmber Kòrsou lo konosé su promé Curaçao Mini Beauty International den un show espektakular di ‘Tinkerbell’.

Mayornan ku ta interesá pa nan yu forma parti di e eksperensia úniko aki por manda un mail na curacao.ibff@gmail.com  huntu ku un potrèt di e yu i lo risibí un invitashon pa por presentá na un kombersashon huntu ku direktiva di I.B.F.F. den e wikènt benidero. Edat pa partisipá den e sertámen aki ta entre 6 pa 10 aña.

I.B.F.F. ta kere firmemente ku kada granito positivo ta aportá na desaroyo di e kresementu sano di un mucha i e proyekto aki sigur lo bai yuda fortalesé e base pa desaroyo di kada mucha ku partisipá den dje.
No pèrdè e oportunidat di laga bo yu eksperensia edukashon, dibertishon i beyesa formando parti di Curaçao Mini Beauty International 2017.