WILLEMSTAD.- Kòrsou (1-2) ayera tabatin un dia liber i ta reanudá su partisipashon awe mainta den Serie del Caribe kontra dje representashon di Nicaragua (0-3). Curaçao Suns despues di su start djaweps ku viktoria riba México, den wikènt a sufri dos derota konsekutivo kontra di Panama (7-3) i Venezuela (7-4), respektivamente.

Den e torneo ku ta tumando lugá na Miami, Panamá (3-0) ta habri siman na promé puesto.

Djasabra tabatin indikashon ku Kòrsou lo por a sòru pa un sorpresa kontra di Venezuela. Pero ku e skor 4-2 despues di terser entrada, e picheo venezolano ta logra kontrolá e ofensiva di Kòrsou ku sigur tabatin su oportunidatnan pa hasi algu na e skor. Pero kada bes di nobo e ofensiva di Kòrsou na momento krusial tabata keda kòrtiku, ounke tambe mester destaká sigur dos hugada di tremendo atrapada di outfield venezolano.

Faltando e partido di ayera nochi entre México i Rep. Dominicana, Kòrsou su sifranan kolektivo tabatin Curaçao Suns na di kuater lugá den bateo, ku Nicaragua na promé puesto, siguí pa Rep. Dominicana i Venezuela.

Pa loke ta fildeo Kòrsou tabata na di tres lugá, figurando tras di México i Panamá, miéntras ku picheo kolektivo di Kòrsou a habri siman na último puesto. Den esaki Venezuela ta liderá, ku su tras Pto. Rico i Rep. Dominicana.

Sifranan individual te despues dje di dos partido di ayera nochi a indiká Coco Balentien (.545) i Roger Bernadina (.455) entre e lidernan pa loke ta trata averahe di bateo. Den departamento di kareda anotá, Balentien na di dos puesto ku 3 kareda. Pa loke ta trata hit, Balentien i e dominikano Emilio Bonifacio tabata na kabes ku 6 kada un, miéntras ku den departamento di homerun Balentien i e mehikano Ornelas a liderá ku 2 (tur e sifranan aki ta sin inkluí e partido di ayera nochi lat).

Departamento di tripel tin 5 hungadó ku un kada un, entre nan Roger Bernadina, Hendrick Clementina i Didi Gregorius.

Curaçao Suns su próksimo kompromiso ta awe mainta 11:30 kontra di Nicaragua

Resultadonan di wikènt:

Rep. Dominicana 5, Pto Rico 2

Panamá 4, México 3

Venezuela 4, Kòrsou 2

Panamá 6, Nicaragua 3

Pto. Rico 6, Venezuela 2

Weganan pa awe:

Kòrsou v/s Nicaragua

Venezuela v/s México

Pto. Rico v/s Panamá

Posishonnan:

(faltando wega México v/s Rep. Dominicana)

Panamá                3-0

Pto. Rico              3-1

Rep.  Dom.          2-1

Venezuela           2-1

Kòrsou                 1-2

México                 0-3

Nicaragua           0-3